Un evento di kareda, un primisia riba Kòrsou
Riba djadumingu 30 di novèmber 2014 lo tuma lugá e promé edishon di e KLM Curacao Marathon den e siudat di Willemstad, Kòrsou. Un primisia riba e isla. E evento di kareda aki lo ta pa grandi i chikí, kaminda skol-, empresa- , grupo i organisashonnan por partisipá via un ruta eksepshonal ku ademas lo tin animashon musikal for di kuminsamentu te final.
Lo tin diferente distansha disponibel pa e partisipantenan. Nan ta – 5km “Walk or Run” (Kana òf Kore), – 10km “Walk or Run” (Kana òf Kore), – Mitar Máratòn – Máratòn Kompleto (Duo) – 15km Trial E evento aki lo ta algu grandi i e organisashon ta konta ku partisipashon di koredornan internashonal.
Ruta
Pa e evento aki a stipulá un ruta ekspeshonal kual ta inisiá na Lions Dive Hotel & Beach Resort, na Bapor Kibra, i ta hiba e partisipantenan di e ”Mitar Máratòn i e ‘Máratòn Kompleto’ a lo largu di parti di kosta i den sentro di Kòrsou, krusa Brùg Emma i, komo eksepshon, Koningin Julianabrug, ku ta un di e brùgnan di mas haltu na mundu, (56,4 meter riba superfisie di laman) kaminda normalmente no ta permití pasada di hende na pia. E famoso Handelskade tambe ta forma parti di e ruta eksepshonal aki.
Animashon i kompañamentu musikal
E ruta ta primintí di bira unu ku hopi músika i ambiente tantu pa e koredornan komo e públiko kant’i kaminda. Radio Dolfijn FM i Curom Z86 lo tin kobertura di e ruta kompleto i lo animá e presentenan ku nan komentario i bon músika for di komienso te final, p’asina rònt Antia i mundu henter por sigui e evento aki bibu i direkto. Hotèlnan riba e ruta manera Avila Beach, Renaissance Curacao Resort & Casino, Hilton Curacao Resort, Kurá Hulanda Village & Spa ku ta keda riba e ruta, tambe Ofisina di Turismo lo ta puntonan pa refreská i pa e ambiente musikal Karibense.
Inougurashon i Klousura
E anochi promé ku e evento lo tin e tradishonal “Fiesta di Pasta”. Preparashon lo ta na enkargo di e Chefkok di 5 strea ala bes koredor di máratòn di Pascal Jalhay, ku en kolaborashon ku ‘Curacao Culinair’ ta kontribuí na e evento. E fiesta di klousura lo tuma lugá riba un di e beachnan mas famoso na Kòrsou, na Lions Dive & Beach Resort. Entrega di premio lo ta riba un “stage” riba laman.
Inskripshon
Inskripshon por tuma lugá riba e website: www.klmcuracaomarathon.com. Tur partisipante ta haña un number di inisio ku registrashon ofisial di su tempu, un medaya i un T-shirt
