…..diferente aktor enbolbí ku e tópiko di seguridat di turista lo partisipá……
WILLEMSTAD- 21 ougùstùs 2014:- Promé siman di sèptèmber lo tuma lugá un programa di training dirigí riba e tópiko di seguridat. Ta trata aki di un training intensivo pa diferente aktor enbolbí ku e tópiko di seguridat di turista. E training ta keda dun á pa 2 eksperto internashonal, Dr. Peter Tarlow i sr. Jason Keller. E programa di training ta bou di kordinashon di Ofisina di Turismo di Kòrsou (CTB).
E programa ta konsistí di diferente tópiko ku ta trata e aspekto di seguridat den relashon ku turismo. Meta di e training ta na promé lugá pa alsa e nivel di konsiensia ora ta trata medidanan di seguridat i pone atenshon na e abilidatnan ku ta kontribuí na un ambiente sigur pa nos turistanan i tur ku ta laborá den e industria di turismo. Tambe ke logra ku e training pa ekipá e partisipante ku e hèrmèntnan nesesario pa por identifiká, enfrentá i respondé na menasanan i insidentenan ku di un forma direkto òf indirekto por tin konsekuensia pa bida di e turista i esnan ku ta laborá den e industria.
Un di e ekspertonan internashonal ku lo kondusí e training ta Dr. Peter Tarlow ku no ta deskonosí pa Kòrsou ya ku na diferente okashon e la bishita nos pais i ku su eksperensia a yuda entre otro den e proseso di lantamentu di e kuerpo di POLITUR. Dr. Peter Tarlow ta un eksperto spesialisá den entre otro e impakto di krímen i terorismo riba sektor di turismo. For di 1990, Dr. Tarlow ta dunando kursonan di turismo, krímen i terorismo na kuerponan polisial, agentenan di seguridat i profeshonalnan den e aria di turismo rònt mundu. E di dos eksperto ta sr. Keller ku ta un polis ku 17 aña di eksperensia den un di Texas su destinashonnan turístiko tòp. Aktualmente e ta laborando komo polis dirigí riba e aspekto di krímen riba kaya. Sr. Keller a desaroyá un programa di defensa propio den kual mas di 1000 hende muhé a partisipá. E gruponan ku lo ta partisipando na e training lo ta POLITUR, Kuerpo Polisial Kòrsou, agentenan di seguridat na aeropuerto, imigrashon, puertonan di haf, hotèl, playa i tambe diferente personal di seguridat priva ku ta laborá den e arianan turístiko.
Ta konta riba un partisipashon aktivo di tur ku partisipá na e programa di training. Garantisá seguridat di e turista ta un parti importante den e totalidat di promoshon di e sektor turístiko. CTB ta gradisí Curaçao Ports Authority i tambe Curaçao Airport Holding ku ta kontribuí na realisashon di e programa di training.
