WILLEMSTAD- 31 di òktober 2014 –Ofisina di Turismo di Kòrsou (CTB) resientemente a duna training na un grupo konsistiendo di Tour Operators, empleadonan di CPA i agentenan di POLITUR. Meta di e training aki tabata pa yuda halsa e nivel di servisio di e empleadonan, kon pa komuniká di un manera efektivo, kon dil ku konflikto i tambe a konsientisá e kursistanan riba diferente aspekto relashoná ku desaroyo di turismo aki na Kòrsou. Durante e selebrashon a hiba palabra Minister di Desaroyo Ekonómiko, sr. Palm, direktor ehekutivo di CPA, sr. de Castro i Presidente di POLITUR, sr. Josefa. Un total di 64 kursista, konsistiendo di 27 Tour Operator, 17 empleado di CPA i 20 agente di POLITUR a risibí nan sertifikado na man di Minister Palm.
Durante di e lunanan tras di lomba e kursistanan a sigui seshonnan di entre otro: atrakshonnan turístiko, historia i kultura di Kòrsou, ekonomia i desaroyo duradero di nos industria turístiko, naturalesa i medioambiente, servisio na kliente, komunikashon efektivo i maneho di konflikto. Ademas di esaki e kursistanan a sigui un seshon spesial ku a enfoká riba e 6 balornan di e kampaña ‘Dushi Hende’ kualnan ta: hospitalidat, servisio, responsabilidat, orguyo, integridat i honestidat. Pa duna e training un toke spesial a tuma un dia pa hasi un rekorido riba nos isla kaminda ku a bishitá diferente atrakshon turístiko. Di e forma aki a krea un bon balansa entre kursonan teorétiko i práktiko pa asina e kursistanan pone den práktika tur loke nan a risibí na informashon.
Den luna di novèmber lo bolbe sertifiká un grupo ku ta konsistí di personanan ku a sigui un programa di training avansá. Ta tipo di kurso manera esaki ta garantisá profeshonalismo i un nivel di servisio haltu. Miéntras ku aña ya ta finalisando, CTB ta trahando riba un programa di training pa aña 2015. Pabien na tur ku a finalisá e training ku éksito!
