WILLEMSTAD- 2 desèmber 2014:- E kompania di aviashon JetBlue Airways a lansa entrante 2 di desèmber dos bes pa siman buelo direkto entre New York i Kòrsou. Awor JetBlue ta ofresé 121 buelo diario for di Estádos Unídos pa Karibe di kual 56 buelo diario ta buelonan direkto for di New York, John F. Kennedy International Airport (JFK) i Newark Liberty International Airport (EWR). E dos aeropuertonan aki ta kubri 26 ruta pa e region di Karibe. JetBlue ta e aerolínea ku ta ofresé mas tantu ruta for di Estádos Unídos pa e área di Karibe ku kualke otro aerolínea. Na yegada di e promé buelo a hiba palabra Minister di Desaroyo Ekonómiko, sr. Stanley Palm, Vice Presidente di JetBlue, sr. Jeffrey Goodell, CEO di CAP sr. Ralph Blanchard i CEO di CHATA, sra. Lizanne Dindial.
“Nos ta kontentu di por añadí un destinashon mas na nos mapa di ruta den Karibe ku e úniko buelo direkto pa Kòrsou for di New York. E isla ta un hoya skondí kual nos ta spera hopi biahero merikano lo bin deskubrí. Ku un tersera parti di nos ret den Karibe i Latino Amérika nos lo sigui ku e esfuersonan pa ekspandé kontinuamente pa ofresé nos klientenan mas tantu posibilidat entre destinashonnan den Karibe kaminda nan por bai pa relahá i disfrutá di e playanan mas bunita na mundu òf bishitá amigu i famianan” sigun sr. Robin Hayes, Presidente di JetBlue.
E 2 buelonan direkto for di JFK pa Kòrsou ta riba djamars i djasabra ku un airbus A320 ku ta ofresé biaheronan un servisio ekselente. E skema di buelo ta: sali 09:00 di mainta for di JFK i yega Kòrsou 2:34 mèrdia i sali Kòrsou 3:45 i yega JFK 7:30 anochi. Personanan ku biaha ku JetBlue pa JFK lo eksperensia un sala di yegada di JFK International Airport super moderno i kompletamente renobá ku a inougurá luna pasa.
“Awe ta un dia grandi pa nos isla i nos ta kontentu di por yama e buelo direkto di JetBlue bon biní na Kòrsou,” asina Minister di Desaroyo Ekonómiko sr. Stanley Palm a duna di konosé. “ Kòrsou a floresé i bira un di e islanan mas diverso i outéntiko den region di Karibe. Komo un isla nos ta rekonosé e importansia di ofresé nos bishitantenan opshonnan di buelo efisiente i aksesibel, i nos ta sigur ku e atkisishon aki lo kumpli ku e demanda ku nos ta mira for di e área Tri-state.”
“CAP ta sumamente kontentu di por yama bon biní na JetBlue den e ret di aerolíneanan internashonal ku ta ofresé nan servisionan na nos aeropuerto. JetBlue ta un aerolínea ekselente, i huntu ku e potensial eksepshonal di e merkado nortost di Estádos Unídos e servisio nobo aki lo forma un kombinashon fuerte ku por benefisiá Kòrsou i e produkto turístiko na un manera signifikante i positivo. Nos lo hasi nos parti pa yuda JetBlue hasi e servisio nobo aki mas eksitoso posibel” asina sr. Ralph Blanchard, CEO di CAP a ekspresá.
Ofisina di Turismo di Kòrsou (CTB), Curaçao Airport Partners (CAP) i Curaçao Hospitality and Tourism Association (CHATA) ta mira e importansia di mas airlift entre Kòrsou i Estádos Unídos i ta p’esei a traha huntu pa asina logra ku JetBlue Airways a keda añadí na e skema di buelonan pa nos isla. CTB, CAP i CHATA ta yama JetBlue Airways un kaluroso bon biní i ta spera di por konta ku un fluho di turista kontinuo i kresiente for di New York.
