WILLEMSTAD- 15 di desèmber 2014 – Resientemente Kòrsou a keda selektá pa partisipá den e kompetensia di ‘10 Best Readers Choice Travel Award’ di USA TODAY den e kategoria di ‘Best Romantic Caribbean Island’. Despues di 4 siman ku por a vota pa e ‘Isla mas romántiko den Karibe’ e resultado a bira konosí ku Kòrsou a sali number dos den e kompetensia. Nevis a sali number un.
E wèpsait di USA TODAY a anunsiá e sobra paisnan ku tambe a kai den premio, kualnan ta Anguilla number 3, St. Lucia number 4 i Martinique number 5. Mas aleu e wèpsait ta menshoná ku Kòrsou a keda sólido pará na puesto number 2. Curaçao e ‘C’ den e islanan hulandes ABC ta konosí pa su sentro di siudat vibrante i su 40 playanan, di e manera aki e wèpsait a deskribí Kòrsou. Via di e wèpsait di USA TODAY por mira e resultado. Ofisina di Turismo di Kòrsou (CTB) ta gradisí tur persona ku a vota pa Kòrsou pa asina Kòrsou por a konkista e puesto number 2 den e kompetensia ‘Isla mas romántiko den Karibe’.
