WILLEMSTAD- 23 di desèmber 2014:- Turismo di estadia na luna di novèmber 2014 a registrá un kresementu di 9%. Un total di 42.139turista di estadia a bishita nos isla durante luna di novèmber e aña aki kompará ku 38.579na novèmber 2013. E repartishon den porsentahe di e kantidat di turista di estadia registrá den luna di novèmber ta indiká meskos ku na luna di òktober, ku luna di novèmber tambe nos a risibí mas tantu turista for di region di Sur Amérika kompará ku region di Europa. Pa region di Sur Amérika esaki tabata 37.8% miéntras pa Europa 36.6%.
Un nota positivo ta ku despues di basta luna sin mira kresementu for di region di Nort Amérika, porfin e region ta mustra un kresementu di 12.26% den luna di novèmber. Motibu pa esaki ta e kresementu grandi di 82% for di Canada pa motibu di e buelo nobo di Air Canada for di Toronto ku a kuminsá na novèmber último. Ta bon pa menshoná ku den e promé 11 lunanan di aña e kantidat di turista for di Canada a surpasá 10 mil pa promé bia den historia. Un total di 5.209 turista di estadia a keda registrá for di region di Nort Amérika den luna di novèmber 2014. Den futuro serkano e buelo nobo for di New York ku JetBlue kual a keda inougurá dia 2 di desèmber último i e buelo nobo entrante 1 di yanüari 2015 di Air Canada for di Montreal lo sigui afektá e sifranan for di region di Nort Amérika positivamente. For di Karibe un kantidat di 2.806turista a keda registrá pa luna di novèmber.
Region di Sur Amérika a registrá un total di 15.920 turista di estadia den luna di novèmber. For di Venezuela nos a risibí 12.427 turista, esaki ta 16% mas ku e aña anterior. Miéntras ku for di region di Europa 15.408 turista di estadia a bishita nos pais. Hulanda e pais for di kua nos ta risibí mas tantu turista a krese ku 6% den luna di novèmber.Miéntras ku for di Alemania nos a risibí un total di 1.891 turista di estadia. Tambe e merkado di Colombia i Brazil a krese ku respektivamente 36% i 27% den luna di novèmber.
E promé 11 lunanan di aña un kantidat di 408.319 turista di estadia a bishita nos pais. Region di Europa a konosé un subida di 5% den e promé 11 lunanan di aña. Un kantidat di 168.891 turista di estadia a bishita nos for di e region aki. Pa loke ta trata akomodashon por indiká ku durante e promé 11 lunanan di aña, 67.5% di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (30.7%), esnan di ménos ku 150 kamber (14.4%), bùngalo (14.9%), apartamentu (6.5%) i guesthouse (1.0%). E kantidat di turista ku a keda na un akomodashon no registrá ta representá 32.5% di e kantidat di turista ku a bishita nos e promé 11 lunanan di aña. Akomodashonnan no registrá ta akomodashonnan di kual nos no por indiká ku ta un kas di famia, un kas priva òf un apartamentu.
Hasiendo uso di e modelo ‘Turistika’ Ofisina di Turismo di Kòrsou (CTB) huntu ku MEO a kalkulá ku durante e promé 11 lunanan di 2014, sektor di turismo a generá un impakto direkto di 688.9 mion florin pa nos ekonomia lokal. Region di Europa a generá un total di 311.6 mion florin. Su tras ta sigui region di Sur Amérika ku 198.2 mion, Nort Amérika ku 112.7 mion i e entrada generá for di region Karibe a keda kalkulá na 37.1 mion florin.
