WILLEMSTAD- 1 di yanüari 2015: – Aña 2015 ta kuminsá ku notisia positivo pa loke ta trata turismo i spesífikamente e merkado kanades. Dia promé di yanüari 2015, Air Canada a inougurá e ruta; Montreal – Kòrsou – Montreal. E merkado kanades ta kresiendo i lo sigui krese ku e iterinario di buelo nobo aki. E buelo lo sali i regresá Montreal, Canada riba djaweps durante e temporada di winter. Na yegada di e promé buelo a hiba palabra Minister di Desaroyo Ekonómiko, sr. Stanley Palm, Vice Presidente di Benta di Air Canada Vacations, sr.Amr Younes i CEO di CHATA, sra. Lizanne Dindial.
Ademas di e ruta Montreal, Air Canada ta ofresé servisio for di e suidat di Toronto, esaki ta un buelo ku ta tuma lugá henter aña. Air Canada lo bula pa Kòrsou for di Montreal ku un airbus 319 ku un kapasidat di 120 pasahero. Ademas di Air Canada, nos isla ta konta ku Westjet i Sunwing ku tambe ta brinda buelonan for di Toronto, Canada pa Kòrsou. Resientemente a anunsiá ku den e promé 11 lunanan di 2014 e kantidat di turista for di Canada a surpasá 10 mil pa promé biaha den historia.
Ofisina di Turismo di Kòrsou (CTB), huntu ku Curaçao Airport Partners (CAP) i Curaçao Hospitality and Tourism Association (CHATA) a duna e crew i pasaheronan un kaluroso bon bini. Airlift ta di vital importansia pa kresementu di nos turismo, kada un buelo adishonal ta un logro grandi pa Kòrsou.
