…11.291 más turista na 2014 kompará ku 2013…
WILLEMSTAD- 18 di yanüari 2015 – Un total di 452.042 turista di estadia a keda registrá den 2014. Esaki ta 11.291 turista más kompará ku e aña anterior. E kantidat di anochi ku e bishitantenan a keda durante 2014 ta yega na un total di 3.984.212 anochi kual ta 6% mas kompará ku aña 2013. Miéntras e entrada total generá for di turismo pa aña 2014 a keda kalkulá na 763.5 mion florin.
For di region di Europa nos a risibí un total di 186.238 turista di estadia kual ta un subida di 6% kompará ku 2013 kaminda nos a risibí un total di 175.849 turista for di e region aki. For di Hulanda nos a risibí un total di 140.702 turista ku ta nifiká un kresementu di 6%. Region di Sur Amérika a registrá un kresementu di 4%. Venezuela, e pais den region di Sur Amérika for di kua nos ta risibí mas turista a konosé un kresementu di 6%. Un total di 98.331 turista a bishitá nos for di Venezuela. Nort Amérika i Karibe a konosé un bahada di respektivamente 8% i 14%.
Durante 2014, turismo di Kòrsou a konosé logronan den diferente di nos merkadonan sekundario. Alemania a registrá pa promé biaha un kantidat rèkòrt di 19.118 turista di estadia. Esaki ta un kresementu di 8%. Canada a surpasá 12 mil turista. For di Canada nos a risibí 12.468 turista na 2014 esaki ta un kresementu di 30%. Brazil, Colombia i Bèlgika tambe a konosé kresementu di respektivamente 11%, 16% i 7%.
Pa loke ta trata e kantidat di anochi ku e turista a keda riba nos isla esaki a subi ku 6%. Un total di 3.984.212 anochi a keda registrá pa aña 2014. For di e karchinan di embarkashon i desembarkashon por konstatá ku 67.7% di e kantidat total di turista di estadia esta 306.210 turista a keda na un akomodashon registrá. E repartishon ta lo siguiente: hotèl di mas ku 150 kamber (30.7%), esnan di ménos ku 150 kamber (14.4%), bùngalo (15.0%), apartamentu (6.7%) i guesthouse (1.0%). E kantidat di turista ku a keda na un akomodashon no registrá ta representá 32.3% di e kantidat di turista ku a bishita nos durante aña 2014. Akomodashonnan no registrá ta akomodashonnan ku no ta aparesé den nos sistema di dato.
Hasiendo uso di e modelo ‘Turistika’ Ofisina di Turismo di Kòrsou (CTB) huntu ku MEO a kalkulá ku durante 2014, sektor di turismo a generá un impakto direkto di 763.5 mion florin pa nos ekonomia lokal. Durante 2013 e montante tabata 730.9. Region di Europa a generá un total di 343.4 mion florin ku ta 44.9% di e total generá durante 2014. Su tras ta sigui region di Sur Amérika ku 221.5 mion, Nort Amérika ku 127.2 mion i e entrada generá for di region Karibe durante 2014 a keda kalkulá na 40.0 mion florin.
