WILLEMSTAD- 3 di febrüari 2015: Resientemente Ofisina di Turismo di Kòrsou (CTB) huntu ku diferente partner den turismo a partisipá na New York Times Travel Show. E stènt di Kòrsou a hala hopi atenshon, dunando informashon di e buelo nobo nònstòp for di New York ku JetBlue.
New York Times Travel Show ta un di e eksibishonnan di biahe number unu di e region di Nort Amérika. E eksibishon ta konta ku partisipashon di e merkadonan turístiko lider den mundu di entre otro Afrika, Asia, Oustralia, Canada, Eropa, Mexico, Amérika Sentral, Sur Amérika, Estado Unídos i naturalmente Kòrsou.
E eksibishon ta atraé mas ku 500 ekspositor for di 150 nashon inkluyendo ofisinanan di turismo, representashon di barkunan krusero, operador di tour, hotèl/resòrt i otro kompanianan ku ta dirigí riba biahe. E presensia di CTB na e eksibishon ta e oportunidat perfekto pa ta dilanti mas di 6000 profeshonal di komersio, media i konsumidó for di e aria di tri-state.
Huntu ku CTB a partisipá Acoya Curaçao, Floris Suite Hotel, Santa Barbara Beach & Golf Resort i Sunscape Curaçao Resort & Casino. E partnernan priva aki no solamente a duna nan aporte pa yuda fortifiká e nòmber di Kòrsou durante e eksibishon pero tambe a duna nan aporte na e parti di promoshon di e buelo nobo di JetBlue dor di brinda ofertanan spesial. Durante e 3 dianan di e evento e stènt di Kòrsou a repartí mas di 4000 foyeto informativo. E bishitantenan a keda kontentu di por a haña informashon di e buelo di JetBlue pa Kòrsou.
CTB a partisipá tambe na un konferensha ku a tuma lugá durante e New York Times Travel Show. Aki tabata trata di un programa edukativo diseñá pa profeshonalnan di biahe. Huntu ku Caribbean Tourism Organization, Kòrsou a duna un presentashon na mas ku 100 agente di biahe registrá kaminda a presentá informashon detayá di e eventonan mas importante di nos isla manera entre otro Karnaval i Curaçao North Sea Jazz Festival.
Un biaha mas CTB por mira bèk riba un partisipashon sumamente eksitoso. Durante e temporada benidero CTB huntu ku sektor priva lo ta partisipando na diferente eksibishon den e merkadonan prinsipal pa Kòrsou kaminda ta sigui hasi promoshon pa nos dushi pais Kòrsou.
