WILLEMSTAD- 12 di febrüari 2015 – Kòrsou tin un di e karnavalnan di mas kreativo, kolorido i eksepshonal na mundu i sigur den region Karibe. Esaki ta e motibu ku e aña aki tambe Ofisina di Turismo di Kòrsou (CTB) lo ta anfitrion di miembronan di prensa internashonal ku lo bishitá nos isla pa kubri e biaha aki Karnaval 2015, edishon # 45. Ku e kobertura internashonal aki, CTB ke mustra mundu kon nos ta selebrá nos fiesta kultural i motivá tur ku mira e grabashonnan pa próksimo aña nan ta aki pa selebrá Karnaval huntu ku nos.
E aña aki Kòrsou lo risibí bishita di 21 miembro di prensa internashonal for di: Sürnam, Venezuela, Merka i Karibe. E miembronan di prensa internashonal ta di entre otro: Globovision, Radio Musik + POP FM, Sin Etiqueta, One Caribbean Television, South Jersey Times, Chicago Daily Herald i De Waretijd. Banda di akudí na eventonan relashoná ku karnaval i e marchanan, CTB ta probechá di e okashon pa laga e miembronan di prensa sera konosí tambe ku mas aspekto di e produkto Kòrsou. A hinka un programa varia den otro kaminda ta duna oportunidat pa e miembronan di prensa konosé nos sentro di siudat, Banda Ariba, Banda Abou i tambe nos kushina krioyo.
CTB ta hasi su máksimo esfuerso pa keda promové nos Karnaval komo parti importante di nos produkto turístiko. Laga nos duna tur e bishitantenan for di eksterior un kaluroso Bon Bini.
