WILLEMSTAD- 27 febrüari 2015 – For di algun dia kaba bishitantenan di Times Square, New York por atmirá nos isla riba un pantaya grandi por medio di diferente imágen promoshonal. E siman aki a kambia e promoshon pa un video promoshonal di 15 sekònde ku lo mustra mas di Kòrsou komo destinashon faborito den Karibe. E promoshon aki sigur ta di gran impakto pa Kòrsou i ta parti di e esfuersonan ku Ofisina di Turismo di Kòrsou (CTB) ta hasi pa sigui merkadeá nos isla den region norteamerikano.
Time Square, masha popular pa su ‘Ball Drop’ durante kambio di aña, ta e plasa mas bishitá na New York. E pantaya grandi stratégikamente ubiká na 1500 Broadway Ave i 43rd St. ta ofresé un bista masivo di 1,624 pia. Time Square ta kontinuamente okupá ku hopi tráfiko di hende ofresiendo oportunidat di kompra te den oranan lat di anochi. E pantaya ta ubiká den kurason di Times Square un área ku ta keda frekuentá pa aproksimadamente 1.5 mion hende pa dia. Kòrsou su promoshon lo tin un frekuensia di 15 sekònde kada ora, estimá na 20 ora pa dia. E promoshon aki ta kore te ku dia 1 di mei 2015. Nos por sinti nos mes sigur orguyoso ku nos isla ta bria den forma prominente na New York.
