WILLEMSTAD- 6 di mart 2015 – Resientemente Ofisina di Turismo di Kòrsou (CTB) a forma parti di e di 34 edishon di ‘Vitrina Turística ANATO’ ku a tuma lugá den e sala di konferensia grandi “Oscar Pérez Gutiérrez” na Bogotá, Colombia. Ademas di tabata bon representá, Kòrsou a lusi ku un di e stèntnan di mas atraktivo durante e feria di turismo ku a konta ku partisipashon di mas ku 30.500 persona.
ANATO, ku anualmente ta tuma lugá na Colombia ta un di e ferianan internashonal di turismo di mas grandi den Sur Amérika. Entre bishitantenan di e feria tabatin representantenan di vários hotèl, mayorista i personanan interesá den konosé i ofresé servisio turístiko. Tur ku a bishitá e stèntdi Kòrsou a keda altamente impreshoná pa e kantidat grandi di posibilidatnan ku Kòrsou ta ofresé durante henter aña komo destinashon karibense. CTB a hasi uso di e oportunidat pa promové aktividatnan den airu liber i deportenan akuátiko manera buseo i snòrkel. Tambe a presentá Kòrsou su gastronomia i e kantidat enorme di evento i aktividatnan ku tin skematisá pa 2015. A ekstendé un invitashon na e bishitantenan pa presensiá e diferente eventonan ku lo tuma lugá e aña aki na Kòrsou manera entre otro: Curaçao International Film Festival Rotterdam, Curaçao International BlueSeas Festival, Consierto Viva La Musica Latina Curaçao 2015, e di 6 edishon di Curaçao North Sea Jazz Festival i KLM Curaçao Marathon. E hotèlnan ku a partisipá na ANATO 2015 tabata: ACOYA Hotel Suites & Villas, Hilton Curaçao Resort, SunscapeCuraçaoResort, Spa & Casino, Sonesta Kura Hulanda Village & Spa, Renaissance Curaçao Resort & Casino i Santa Barbara Beach & Golf Resort Curaçao. Tur a sa di duna informashon di e paketenan atraktivo ku nan ta brinda pa bishita nos pais.
CTB ta gradisí tur e partnernan ku a yuda den realisashon di e partisipashon na ANATO 2015. Kòrsou a resultá un di e destinashonnan mas notabel i atraktivo di e feria na Colombia.
