WILLEMSTAD- 15 di mart 2015 – Sifranan kolekta pa Ofisina di Turismo di Kòrsou (CTB) ta indiká ku pa luna di febrüari a registrá 4.247 turista di estadia más kompará ku febrüari aña pasa, kontinuando di e manera aki ku e desaroyo positivo ku kual a kuminsá aña. Un total di 39.794 turista a keda registrá na febrüari 2015 kual ta un kresementu di 12%. Na febrüari 2014 e kantidat di turista tabata 35.547.
Temporada di Karnaval 2015 tambe a registrá sifranan positivo kompará ku e mesun temporada aña pasa. CTB a hasi un konteo kuminsando 7 dia promé ku e parada di despedida di Karnaval i a yega na e siguiente konklushon: un total di 11.123 turista di estadia a bishita nos pais den 2015. Aña pasa e mesun periodo un total di 9.256 turista di estadia a keda registrá kual ta un kresementu di 20.2%. E 5 paisnan for di kual nos a risibí mas turista durante e periodo menshoná tabata: Hulanda (3%), Venezuela (69%), Estado Unídos (35%), Canada (20%) i Brazil (77%).
E buelo nobo for di New York ku JetBlue ta reflehá bèk den e sifranan positivo di Estado Unídos. Estado Unídos a registrá un oumento di 25% ku un total di 5.497. E informashon kolekta for di e karchinan di Imigrashon ta indiká ku mayoria bishitante for di Estado Unídos ta prosedente di New York (18.1%), Florida (14.2%), Texas (4.6%), Massachusetts (4.4%) i for di New Jersey (3.7%).
Canada a registrá un kresementu di 15% ku un total di 2.446 turista di estadia den luna di febrüari 2015. E kresementu aki por keda atribuí direktamente na e buelonan semanal for di Toronto ku West Jet, Air Canada i Sunwing. Ademas ampliashon di e skema di buelo di Air Canada entrante 1 di yanüari último ku buelonan direkto for di Montreal pa Kòrsou tambe tabata instrumental den kresementu di e merkado di Canada. Banda di esei e esfuersonan di merkadeo huntu ku partnernan den industria di turismo a trese mehorashon den e prestashon di e merkado di Nort Amérika.
Region di Sur Amérika a krese ku 34% na febrüari 2015. A registrá un total di 11.207 turista kompará ku 8.351 na 2014. For di Venezuela un oumento di 38% a keda registrá. Un total di 7.863 turista Venezolano a bishita nos pais den luna di febrüari. Brazil, Colombia i Sürnam tambe a registrá kresementu den kantidat di turista di estadia. Respektivamente 44%, 30% i 26% más turista. E buelo nobo di InselAir for di Guyana kual a kuminsá 18 di desèmber 2014 tambe ta dunando fruta. Un total di 148 turista a bishita nos for di Guyana kompará ku solamente 45 na febrüari 2014.
For di region di Europa nos a registrá un total di 16.509 turista durante luna di febrüari kompará ku 16.423 na febrüari 2014. For di Hulanda, e pais for di kua nos ta registrá mas tantu turista nos a risibí 12.594 turista kual ta un oumento di 3%. Resultadonan di investigashonnan di merkado ta konfirmá e popularidat di Kòrsou na Hulanda pa kual motibu ta kere ku e merkado lo sigui desaroyá positivamente. Bèlgika a registrá un oumento di 50%. Turismo di estadia for di region di Karibe a konosé un kaida di 12% durante luna di febrüari. Sí por a nota ku e buelo nobo di InselAir for di Trinidad & Tobago ku a start 15 di desèmber 2014 ta reflehando bèk den e kantidat di turista ku a bishitá nos pais. Na luna di febrüari e kantidat di turista a oumentá ku 11% ku un total di 406 turista.
Pa loke ta trata e kantidat di anochi ku e bishitante ta keda nos pais esaki a krese ku 7% durante e promé 2 lunanan di aña. Sifranan preliminar ta mustra un total di 744.759 anochi. Aña pasa un kantidat di 694.624 anochi a keda registrá. For di e karchinan di embarkashon i desembarkashon por konstatá ku 70.0% di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (31.6%), esnan di ménos ku 150 kamber (14.1%), bùngalo (15.5%), apartamentu (7.8%) i guesthouse (0.9%). E kantidat di turista ku a keda na un akomodashon no registrá ta representá 30.0% di e kantidat di turista ku a bishita nos durante e promé luna di aña. Akomodashonnan no registrá ta akomodashonnan ku no ta aparesé den CTB su sistema di dato.
Hasiendo uso di e modelo ‘Turistika’ Ofisina di Turismo di Kòrsou (CTB) huntu ku MEO a kalkulá ku durante febrüari 2015, sektor di turismo a generá un impakto direkto di 145.6 mion florin pa nos ekonomia lokal. Na febrüari 2014 e montante tabata 125.9 mion. Region di Europa a generá un total di 65.3 mion florin kual ta 44.9% di e totalidat. Su tras ta sigui region di Sur Amérika ku 38.9 mion, Nort Amérika ku 31.3 mion i e entrada generá for di region Karibe a keda kalkulá na 5.6 mion florin.
Bo tabata sa?
51% di e kantidat di turista di estadia ku a bishitá Kòrsou durante e promé dos lunanan di aña ta hende muhé. E grupo di edat ku mas a bishitá nos pais durante di e periodo menshoná tin entre 25 pa 44 aña di edat. Su tras ta sigui esnan entre 45 i 64 aña di edat. Nos por konkluí for di esaki ku esnan ku ta bishita Kòrsou mayoria biaha ta parehanan ku no tin yu òf e yunan ta grandi sufisiente ku nan por keda kas nan so. Esaki ta Kòrsou su grupo di enfoke prinsipal.
Bishitantenan for di Estado Unídos repartí bou di e diferente estadonan
Bishitantenan repartí na grupo di edat
Overall Visitor Arrival Performance – Febrüari 2015
