WILLEMSTAD- 23 di mart 2015:- Durante di un rueda di prensa, Ofisina di Turismo di Kòrsou (CTB) a duna informashon di e logronan di 2014 riba tereno di “airlift”, merkadeo i desaroyo di produkto ku a kontribuí na e kresementu di turismo. A duna splikashon tokante sistema di kompilá informashon di estadístika i entrada generá for di impuesto riba kamber (room tax). Mas aleu a para ketu na algun inisiativa importante pa 2015. Na e rueda di prensa a hiba palabra Minister di Desaroyo Ekonómiko, sr. Stanley Palm, Direktor interino di CTB, sr. Hugo Clarinda i Presidente di Hunta di Direktiva di CTB, sra. Jeanette Hooi – Bonet.
Kresementu di turismo den Karibe 2004 – 2014
Un análisis hasí resientemente dor di Caribbean Tourism Organization (CTO) di kresementu di turismo di diferente paisnan den Karibe kubriendo un periodo di 10 aña entre 2004 pa 2014 ta indiká ku Kòrsou ta e pais ku a konosé e averahe di kresementu di mas grandi. Na kantidat total di turista e paisnan aki ta risibí mas turista pero na porsentahe Kòrsou su turismo a krese mas durante e periodo menshoná. E resultado ta lo siguiente: Repúblika Dominikana su turismo a krese ku 49.3%, Jamaica ku 46.5%, Cuba ku 47.03%, Aruba ku 47.2% miéntras ku Kòrsou su turismo den un periodo di 10 aña a krese ku 102.3%. Na 2004 un total di 222.424 turista a bishita nos pais, na 2008 e kantidat tabata 404.199 miéntras ku a sera aña 2014 ku un total di 453.270 bishitante. Na 2014 e turistanan aki huntu a keda un kantidat di 3,996,000 anochi riba nos pais. Minister Palm a elaborá riba e impakto ekonómiko di sektor turístiko i a splika e importansia di turismo pa nos ekonomia. Hasiendo uso di e modelo ‘Turistika’ CTB huntu ku MEO a kalkulá ku durante 2014, sektor di turismo a generá un impakto direkto di 763.5 mion florin pa nos ekonomia lokal.
Indikadónan di desaroyo turístiko
Durante 2014 un total di 31% di nos bishitantenan a keda na un hotèl grandi, esta di mas ku 150 kamber, 53% a bishitá nos pa promé biaha, 36% a reserva via di un agente di biahe, 31% a bini riba rekomendashon di un famia òf amigu i mayoria turista ku ta bishitá nos pais tin entre 25 pa 44 aña di edat. Su tras ta sigui esnan entre 45 i 64 aña di edat.
Kompilashon di estadístika di turismo
Sr. Clarinda a duna un splikashon kon ta yega na e sifranan ku ta presentá tur luna riba kresementu di turismo. Pa por yega na su sifranan CTB ta hasi uso di e informashon kolekta for di e karchinan di embarkashon i desembarkashon(ED card). For di e ED card ta kolekta entre otro: informashon personal di e bishitante, for di unda e ta bini, propósito di su bishita, dikon e la skohe pa Kòrsou, kon e la hasi su reservashon, durashon di su biahe i e akomodashon ku e la skohe pa keda durante su vakashon riba nos isla. Durante di e rueda di prensa CTB a informá ku ta trahando riba un vershon online di e karchinan aki. Ku introdukshon di e ED card online kier logra pa baha e kantidat di tempu ku e turista ta para den rei na su yegada na nos pais ya ku e informashon ku keda yená online lo ta mesora den e sistema ku e personal di imigrashon ta usa. Despues di un periodo di tèst lo pasa pa introdukshon di e ED card online.
Impuesto riba kamber (Room Tax)
Room tax ta enserá un belasting ku ta keda kobrá riba akomodashonnan ku ta keda di hür ku personanan ku no ta inskribí aki na Kòrsou esta turista. E entrada generá for di room tax na 2013 tabata 9.8 mion florin miéntras ku na 2014 esaki a subi ku 21.9% i a yega na un total di 12.1 mion florin. E lei di room tax ta konta tantu pa hotèl komo apartamentunan. Na e momentunan aki no ta tur apartamentu ta pagando room tax. Motibu pa kua ta trahando riba e lei di registrashon di akomodashon turístiko. Ku e entrada generá for di room tax CTB ta ehekutá diferente kampañanan promoshonal i publisitario den eksterior tur ku e meta pa atraé mas bishitante pa Kòrsou. Pues mas entrada for di room tax ta nifiká mas promoshon pa Kòrsou kual lo trese mas turista i mas turista ta nifiká mas entrada pa nos ekonomia lokal.
Merkadeo
Riba tereno di merkadeo sr. Clarinda a para ketu na e diferente esfuersonan ku a realisá den merkadonan internashonal primario i sekundario ku e meta pa promové nos pais. Aki ta trata di entre otro: seminario edukativo den diferente siudat, feria turístiko, konferensia, kampañanan promoshonal, kampañanan publisitario i eventonan spesialmente dirigí riba prensa, agentenan di biahe, operadornan di tour i otro gruponan di interes. Durante 2014 a organisá na Kòrsou tambe konferensianan pa mayoristanan for di Merka, Canada, Europa i Latino Amérika. Tur ku e meta pa laga e gruponan aki bin konosé i eksperensia e produkto ku Kòrsou ta ofresé di aserka. Tambe a tuma lugá diferente kampañanan promoshonal ku a keda ehekutá huntu ku entre otro American Airlines, InselAir, JetBlue,COPA, Avianca, AirBerlin i KLM. Den konsultashon estrecho ku e diferente aerolineanan ku ta sirbi Kòrsou, lo sigui bini ku paketenan atraktivo. Kòrsou a konosé den 2014 buelonan inougural di InselAir pa Barranquilla, Georgetown, Trinidad and Tobago i La Romana, Rutaca Airlines for di Venezuela, Aerolineas MAS for di Repúblika Dominikana i JetBlue ku 2 buelo pa siman for di New York. Aña 2015 a habri ku e buelo direkto for di Montreal ku Air Canada.
Desaroyo di Produkto
Sr. Clarinda a para ketu tambe na logronan riba nivel di desaroyo di produkto. Pa loke ta trata desaroyo di produkto den 2014 a ehekutá diferente training riba tereno di seguridat, formashon i tambe konsientisashon di turismo pa entre otro e siguiente gruponan: POLITUR, Kuerpo Polisial Kòrsou, duana, imigrashon, agentenan di seguridat na aeropuerto, haf, hotèl, playa, i tambe diferente personal di seguridat privá ku ta laborá den e arianan turístiko. Tambe a ehekutá e programa di sertifikashon di operador di buseo i restorant pa perkurá ku establesimentunan den turismo ta funshoná konsistentemente riba e nivel di kalidat i seguridat ku e bishitante ta spera di nos destinashon. Otro ehèmpelnan riba tereno di desaroyo di produkto ta diferente proyektonan di limpiesa den arianan turístiko manera entre otro e proyekto Punda Limpi i Bunita kual ta keda ehekutá den estrecho koperashon ku partnernan, diferente proyektonan di upgrading manera konstrukshon di palapa i fasilidatnan manera entre otro tualèt públiko na arianan turístiko. Tambe Minister Palm a duna informashon riba e proyekto Desaroyo Kosta Marie Pampoen kual a keda lansa na desèmber 2014.
Master Plan
Minister Palm a duna informashon di e trayekto ku ta kanando pa yega na e Master Plan nobo di Turismo ku mester bai kubri e periodo di 2015 – 2020. Despues ku e plan ta kla esaki lo keda presentá na Ministerraad pa aprobashon pa por pasa seguidamente pa implementashon di e plan. Sra. Jeanette Hooi – Bonet a hasi uso di e oportunidat pa pidi tur stakeholder i komunidat pa duna sosten na e Master Plan ora ku esaki drenta den su fase di implementashon.
Konferensianan internashonal
Minister Palm a informá ku e aña aki lo bai tuma lugá dos konferensia internashonal. Ta trata di e Caribbean International Safety & Security Conference ku lo tuma lugá di 24 pa 26 di yüni próksimo i e State of the Industry Conference 2015 kual lo tuma lugá di 21 pa 23 di òktober aki na Kòrsou. Pa tur dos konferensia ta spera hopi partisipante internashonal.
