…Kampaña pa stimulá benta di pasashi for di Hulanda pa Kòrsou…
WILLEMSTAD – 23 di aprel 2015– Djamars último na Hulanda a duna inisio na e kampaña di insentivo ‘Curaçao Sales Run’. Meta di e kampaña aki ta pa promové benta di pasashi pa Kòrsou den luna di novèmber kual ta tradishonalmente un luna slow den benta. E lansamentu a tuma lugá den Olympisch Stadion na Amsterdam. Aktor yu di Kòrsou Everon Jackson Hooi a lòs e tiru di inisio i a bisti e medayanan ku lo keda otorgá na e partisipantenan di ‘KLM Curaçao Marathon 2015’ ku lo tuma lugá na novèmber próksimo.
Ofisina di Turismo di Kòrsou (CTB), KLM i e fundashon Run in the Sun a desaroyá e kampaña di insentivo spesialmente pa agentenan di biahe hulandes. E ‘KLM Curaçao Sales Run’ a keda risibí ku mashá entusiasmo serka e agentenan di biahe. Mesora a kuminsá ku e ‘kareda pa benta’: Ken por bende mas tantu biahe ku e kompania di aviashon KLM pa nos destinashon, Kòrsou. Agentenan di biahe ku bende mas tantu ticket pa Kòrsou ku KLM den luna di novèmber tin oportunidat di gana un biahe di estudio di 5 dia pa Kòrsou. E úniko rekisito ta, ku e biahe ku nan bende mester keda realisá den novèmber. Ademas di esaki, e premio prinsipal ta inkluí un karchi pa partisipá na ‘KLM Curaçao Marathon’ ku lo tuma lugá dia 29 di novèmber próksimo. Na tur tin 30 lugá disponibel pa operatornan turístiko, agentenan di biahe i asesornan di biahe independiente. CTB ta konvensí ku e kampaña aki lo stimulá biahe pa Kòrsou den e luna slow di novèmber.
