WILLEMSTAD- 12 di mei 2015:- Resientemente Ofisina di Turismo di Kòrsou huntu ku partnernan lokal a konkluí un roadshow na Medellin, Colombia ku a hiba di titulo ‘Colombia mas cerca 2015’. Mustrando e interes kresiente di Kòrsou serka Colombianonan. E roadshow a reuní representantenan di hotèl, operador di tour, kompanianan di aviashon huntu ku mayoristanan, agentenan di biahe i medionan di komunikashon na Colombia.
Durante 3 dia e tim di Kòrsou a tenevários presentashon edukativo pa e grupo di mayorista, agentenan di biahe i medionan di komunikashon. E roadshow ta forma parti di e esfuersonan pa asina demostrá Kòrsou su potensial tantu riba tereno komersial komo turístiko. Ademas e roadshow a brinda oportunidat tambe pa konsolidá e relashonnan ku Kòrsou tin kaba ku Colombia. Vários partner den industria tabat’ei presente pa asina duna informashon di e produkto i servisionan ku nan ta ofresé. E partnernan aki ta: Santa Barbara Beach & Golf Resort Curaçao, Renaissance Curaçao Resort & Casino, Sunscape Curaçao Resort,Spa&Casino, Hilton Curaçao, Kontiki Beach Resort, Papagayo Curaçao, Jan Thiel Resort Curaçao, Scooby Tours i Insel Air.
Komo parti di e roadshow a organisá un desayuno pa mayoristanan na Medellin pa asina duna splikashon di e plan di akshon pa 2015 kaminda ta inkluí e asina yama ‘mayoristas comprometidos’ esta e mayoristanan ku ta komprometé nan mes i ta hasi esfuerso pa bende nos destinashon Kòrsou. A organisá tambe un tayer pa mas di 40 agente di biahe kual a tuma lugá na e ofisina di Insel Air.
CTB a tene tambe un reunion ku DESTINOJET Medellin kual ta e mayorista ku ta enkargá ku e empresanan mas importante na Colombia manera Grupo BanColombia, Grupo Suramericana i Grupo NUTRESA. E reunionnan aki a kana hopi positivo. Kòrsou a sa di presentá su mes komo e sitio ideal pa por organisá eventonan grandi.
