WILLEMSTAD- 30 di yüni 2015 – Pa di 7 aña konsekutivo Ofisina di Turismo di Kòrsou (CTB) ta honra e mihó graduadonan den sektor di Turismo i Hospitalidat. E award di ‘Dushi Hende’ a bai pa 11 hóben ku a sobresalí dor di terminá nan aña eskolar ku resultadonan ekstraordinario. Na e okashon aki a hiba palabra Minister di Desaroyo Ekonómiko, sr. Stanley Palm i Manager di Departamentu di Produkto sr. Ritzel Godfried.
Tur aña di nobo CTB ta pone lus riba e studiantenan ku a sobresalí den e aña eskolar ku a finalisá. E rekonosementu aki lo mester sirbi pa duna e studiantenan aki un èkstra motivashon pa nan kontinuá hasiendo nan máksimo esfuerso den nan próksimo estudio òf riba merkado laboral turístiko. Tambe e rekonosementu aki lo mester sirbi pa motivá e hóbennan ku aworakí ta siguiendo nan estudio den e direkshon di Turismo i/òf Hospitalidat pa próksimo aña eskolar nan por ta esun ku ta risibí e award di ‘Dushi Hende’. E award di ‘Dushi Hende’ ta para pa 6 balor klave kualnan ta: hospitalidat, servisio, responsabilidat, orguyo, integridat i honestidat.
E hóbennan ku a risibí e award di ‘Dushi Hende’ ta hóbennan ku a bishitá diferente skol lokal i sigui nan estudio di Turismo i/òf Hospitalidat riba nivel di VSBO, SBO òf Bachelor. Ta trata di: Andrew Hatma (CDC), Louvienne van Wessel, Marimar Seales i Shyron Rosalia (Nilda Pinto SBO), Chantelly Pauletta (Jacques Ferrandi VSBO), Qyhaila Perez (Marnix VSBO), Faumiri Helena Frans (FEFFIK), Marsheline Santiroma i Natasha Ledgister (Maris Stella SBO), Edeliënne Kirindongo (Maris Stella VSBO) i Samantha Pikero (ICUC). CTB ta felisitá i yama danki na mayornan i dosentenan ku a guia e hóbennan aki pa nan por a alkansá nan meta. Masha pabien.
