…A presentá nos atrakshonnan akuátiko durante feria di Diving Equipment & Marketing Association…
WILLEMSTAD- 16 novèmber 2015:- Ofisina di Turismo di Kòrsou (CTB) a uni ku operadornan di buseo i hotèlnan pa partisipá den e show anual DEMA (Diving Equipment & Marketing Association). Ta trata aki di e úniko evento internashonal dediká na e industria di buseo, deporte akuátiko i industria di biahe.
DEMA a tuma lugá di 4 pa 7 di novèmber último na Orange County Convention Center na Orlando, Florida. E evento a trese kumpradó i rebendedónan den industria di buseo huntu pa ekshibí nan produkto, kumpra produktonan, hasi pedido di produkto pa entrega despues, sera konosí ku lidernan den industria turístiko i alabes siña mas tokante tópikonan i trèntnan nobo den buseo. E ‘booth’ di Kòrsou a brinda bishitantenan di DEMA, esta profeshonalnan di buseo i partnernan den sektor di turismo, e oportunidat di sera konosí ku Kòrsou su bida marítimo, atrakshonnan akuátiko i e 65 sitionan di buseo ku Kòrsou tin pa ofresé kualnan ta fásilmente aksesibel via tera òf ku boto. Tambe a promové Kòrsou su ref ku a keda pa gran parti intachabel pa kontaminashon industrial i meteorológiko.
CTB a risibí sosten di vários partner den sektor privá di buseo i hotèl, entre otro All West Apartments & Diving, Bounty Adventures BV, Caribbean Sea Sports, Duikcentrum van de Ven, Goby Divers, Hilton Curaçao, Lions Dive Beach Resort, Livingstone Jan Thiel Resort, Lodge Kura Hulanda Beach Club, Ocean Encounters Diving, Punta West Bed & Breakfast i Sunscape Curaçao Resort.
