…Un total di 37 agente di biahe i 16 miembro di prensa…
WILLEMSTAD- 1 desèmber 2015– Dia 29 di novèmber último un total di 2100 atleta for di 33 pais a krusa brùg di ponton durante e di dos edishon di KLM Marathon. Ademas di a konta ku un kantidat grandi di partisipante lokal i tambe internashonal a konta tambe ku partisipashon di 37 agente di biahe hulandes, 3 prensa hulandes, 9 prensa for di Aruba, 3 for di Sürnam i unu for di Trinidad. E prensanan internashonal a bini spesialmente pa kubri e evento miéntras algun di nan a partisipá tambe na e máratòn huntu ku e agentenan di biahe. Ta bon pa remarká ku e miembro di prensa for di Trinidad a resultá number 2 den e kategoria di ‘halve marathon’.
E agentenan di biaha ta e ganadornan di e KLM Curaçao Sales Run ku a keda organisá pa KLM, Ofisina di Turismo di Kòrsou (CTB) i Stichting Run in The Sun. E KLM Curaçao Sales Run tabatin komo meta prinsipal pa stimulá benta di tíket pa Kòrsou i partisipashon na e máratòn. Esnan ku a bende mas tíket durante luna di novèmber a gana e oportunidat di forma parti di un trep pa Kòrsou kuminsando 26 di novèmber te ku promé di desèmber. E 37 agentenan di biahe ku a gana e kompetensia a bishitá Kòrsou i a eksplorá nos isla, sera konosí poko mas di aserka ku nos produkto turístiko i a partisipá tambe den e KLM Curaçao Marathon.
E prensanan for di Sürnam, Hulanda, Aruba i Trinidad tabata di diferente kanal di televishon, medionan sosial, korant i stashon di radio. Ta trata aki di: korant Diario, Telearuba, zoomaruba.com, radio Solo di Pueblo, ITV, korant Awemainta, Girlslove2Run, ABC TV/Radio, ATV i algun prensa ‘freelance’ ku ta relatá eventonan deportivo. E prensanan for di Aruba tabat’ei den kuadro di e wikènt deportivo aki na Kòrsou kubriendo diferente aktividat deportivo riba nos isla. Pa CTB eventonan manera e KLM Curaçao Marathon ta yuda propagandá nos isla bou di esnan ku ta gusta partisipá òf sigui eventonan deportivo.
