…468.442 turista di estadia a keda registrá resultando den 3% kresementu…
WILLEMSTAD- 21 di yanüari 2016 – Ofisina di Turismo di Kòrsou (CTB) ta informá ku turismo di estadia na aña 2015 a konosé un kresementu di 3%. Un total di 468.442 turista di estadia a keda risibí durante di e aña tras di lomba kual ta 14.000 turista mas na aña 2015. Na 2014 un total di 454.558 turista a bishita nos pais.
Aña 2015 a kuminsá ku un kresementu hopi fuerte den e promé kuartal di 2015 kaminda nos a konosé kresementu di 13% na luna di yanüari i 11% na febrüari i mart. E di dos kuartal di aña a konosé un bahada na yüni ku 9% ménos turista di estadia. E di dos kuartal di aña ta konosí tambe komo Kòrsou su temporada slou den turismo ku mei i yüni komo e dos lunanan kaminda ménos persona ta biaha pa Kòrsou. Pa loke ta trata e di tres kuartal di aña, un kresementu positivo di 6% a keda registrá na sèptèmber 2015. E kresementu aki ta komo resultado di e Curaçao North Sea Jazz festival. E bahada leve di 2% na luna di ougùstùs 2015 ta komo resultado di e kambio den fecha di e festival for di e añanan anterior. E delaster kuartal di aña kual a kuminsá ku bahada leve den òktober i novèmber a terminá ku un kresementu na desèmber 2015. Loke ta remarkabel ta ku e sifranan ta mustra un diferensia di 16.000 turista entre e luna ku ménos i esun ku mihó prestashon.
Hasiendo uso di e modelo ‘Turistika’, CTB huntu ku MEO a kalkulá ku den 2015, sektor di turismo a generá un impakto direkto di 815.7 mion florin pa nos ekonomia lokal. E montante aki ta representá un oumento di 6% kompará ku 2014 kaminda un total di 767.9 mion florin a keda generá. Bishitantenan europeo ta responsabel pa 45.4% di e total. Tur huntu turistanan europeo a gasta 370.1 mion florin, siguí pa e turistanan for di e merkado di Sur Amérika ku 217.6 mion florin i esnan for di Nort Amérika ku 157.6 mion florin. E entradanan generá for di Karibe ta 45 mion florin.
E turista ta gasta su sèn primordialmente na akomodashon (36%), kuminda i bebida (24%), kompra (23%), transporte (9%) i impuestonan direkto (8%).
Sifranan preliminar luna di novèmber 2015:
Sifranan preliminar kolekta pa CTB ta indiká ku un di 42.480 turista di estadia a keda risibí na novèmber 2015. Nos a risibí 1% ménos turista kompará ku novèmber 2014. Na 2014 un total di 42.973 turista a bishita nos pais.
No opstante e bahada den kantidat di turista di estadia, nos ta mira un prestashon positivo di Europa, Nòrt Amérika i e region di Karibe. Turismo di estadia for di Europa a subi ku 10% ku un total di 17.438 turista. For di e region aki CTB a registrá 9% kresementu for di Hulanda ku un total di 12.723 turista. Alemania tambe a konosé kresementu di 17% kompará ku novèmber 2014. Un total di 2.256 turista a bishita nos pais.
E region Norteamerikano a registrá un kresementu di 18%. For di Estádos Unídos nos a risibí un total di 4.889 turista kual ta representá un kresementu di 19% kompará ku 2014. For di Canada, CTB a registrá un bunita komienso di e periodo haltu di turismo ku 17% kresementu kual ta 1.394 turista den sifranan apsoluto. Karibe a registrá un oumento di 7%. Un total di 3.052 turista di estadia a keda registrá den luna di novèmber 2015. For di Aruba a registrá un bahada di 12% ku un total di 1.336 turista di estadia. Trinidad & Tobago a registrá 701 turista, un oumento di 42% ku a influensia e sifranan total di region Karibe positivamente.
Venezuela a registrá un bahada di 14% den luna di novèmber 2015. No opstante e bahada for di Venezuela tòg un total di 10.822 venezolano a bishita Kòrsou den luna di novèmber. Eliminashon di e visa pa Kolombiano a kontribuí na kresementu for di e merkado aki. Por konstatá ku un total di 1.164 Kolombiano a bishita nos den luna di novèmber.
Sifranan preliminar luna di desèmber 2015:
E delaster luna di 2015 a sera positivo registrando un kresementu di 5% den turismo di estadia. Un total di 46.684 turista a bishita nos pais. Sur Amérika ta e úniko region ku a registrá bahada. E otro regionnan a registrá sifranan positivo pa e industria di turismo. E prestashon negativo di Sur Amérika ta influensiá dor di e situashon aktual na Venezuela, aunke ta bon pa remarká ku no opstante esaki e venesolanonan a kontribuí na 20% di e total di turista ku keda risibí na luna di desèmber 2015. Un total di 9.468 turista kompará ku 10.365 na desèmber 2014. Colombia a krese ku 24% ku un total di 1.882 turista.
For di Nort Amérika 16% mas turista a keda registrá. Esaki ta un total rèkòrt di 8.865 ku 6.344 for di Estádos Unídos. A hasi nèt un aña ku JetBlue a kuminsá bula Kòrsou i nos ta mirando e sifranan positivo for di Merka. Ademas e ruta nobo di American Airlines for di Charlotte tambe a kontribuí na e prestashon positivo di Estádos Unídos. Un total di 2.521 turista a bishita nos for di Canada den luna di desèmber 2015. Esaki ta un kresementu di 28%.
Semper luna di desèmber ta un luna den kua nos ta registrá sifranan positivo for di Europa. Desèmber 2015 un total rekòrt di 19.195 europeo a yega Kòrsou. Esaki ta un kresementu di 9% kompará ku desèmber 2014 kaminda 17.582 europeo a bishita nos. Un total di 14.426 hulandes a bishita nos pais kual ta 31% di tur turista ku a bishita Kòrsou na desèmber 2015. Buelonan adishonal ku TUI i KLM ta esnan ku sigur a kontribuí na e kresementu for di Hulanda. CTB ta kontentu ku e partnership ku tur dos aerolinea.
For di region Karibe un kresementu di 22% a keda registrá. Un total di 3.056 turista a bishita nos pais for di region Karibe. Aruba a registrá un kresementu di 16% ku un total di 1.531 kompará ku desèmber 2014.
Overall Visitor Arrival Performance November 2015
Overall Visitor Arrival Performance December 2015
