WILLEMSTAD- 21 di febrüari 2016– Manera konosí karnaval di Rio de Janeiro ta karga e lema di e show di mas grandi di mundu. Kòrsou pa medio di e promoshon realisá dor di Ofisina di Turismo di Kòrsou (CTB) a logra hala atenshon den medionan di komunikashon di Brazil pa su camarote durante di e fechanan di karnaval na Rio. Camarote ta un espasio spesial pa invitadonan den e Sambodromo na Sapucai, Rio de Janeiro, kaminda mas di 75.000 mil hende ta bin pa mira e show mas grandi di mundu, esta karnaval di Rio.
Tur brasilero ta anhelá di por mira karnaval invitá den un camarote. CTB durante aña pasa a usa esaki komo insentivo pa stimulá mayoristanan na Brazil pa bende Kòrsou komo destinashon turístiko ku chèns di gana e oportunidat di gosa di karnaval for di e camarote di CTB. Banda di esaki a invitá tambe vários artista i selebridat na Brazil. Esaki a hala atenshon di medionan di komunikashon importante na Brazil. E resultado ta un tremendo kobertura na entre otro televishon, den kolumnanan i revistanan importante na Brazil.
Kòrsou a haña kobertura den entre otro: O’Globo, Journal do Brazil, e revista Caras i tambe algun biaha den Show di Amaury Jr. ku ta un show hopi mira den oranan di anochi lat. E kantidat grandi di artista i selebridat a keda enkabesá pa e aktris Juliana Alves, kende ta e kara di Kòrsou na Brazil. E tabata tambe na mes momentu ‘Reina di Bateria’, enkabesando un banda di samba di mas di 200 persona di e grupo Unidos da Tijuca. Otro selebridatnan ku tambe a bishitá e camarote di Kòrsou tabata: e kantante Ludmilla, Adriana Bombom (presentadó), Anaju Dorigon (aktris), Adriane Galisteu (presentadó) i Amaury Jr. (presentadó) pa menshoná algun.
