WILLEMSTAD- 23 di febrüari 2016– Resientemente Ofisina di Turismo di Kòrsou (CTB) huntu ku diferente partner a partisipá na e di 24 edishon di ‘Duikvaker’. Anualmente ‘The Exhibition Company BV’ ta presentá e feria dediká na tur amante di buseo i snòrkel na Expo Houten, Hulanda. E aña aki ‘Duikvaker’ a kubri 3 sala di ekshibishon i a konta ku aproksimadamente 10,000 bishitante durante 2 dia largu. Kompanianan ku ta ofresé ekipo di buseo i snòrkel a ekshibí nan portafolio di mas nobo i a demonstrá e último tendensianan den e mundu di buseo. Durante di e feria e bishitante tabatin e oportunidat pa tuma informashon na e diferente stèntnan di e destinashonnan presente; interes pa Kòrsou tabata grandi.
Kòrsou a keda bon representá dor di vários skol di buseo ku a eksponé tur loke nos tin pa ofresé na e turista sambuyadó i tur ku ta bishitá nos isla spesífikamente pa snòrkel. E stènt di Kòrsou a kubri un total di 15 meter kuadrá den kual por a konta ku representashon di: All West Apartments & Go West Diving, Atlantis Diving, Blue Bay Dive & Watersports, Lions Dive & Beach Resort Curaçao i Ocean Encounters Diving.
Turismo di buseo ta un segmento hopi importante pa CTB. Kòrsou tin hopi di ofresé tambe na e amante di buseo, pa e motibu aki partisipashon na un feria manera ‘Duikvaker’ ta esensial. Tur ku sambuyá òf snòrkel den awanan di Kòrsou semper ta keda impreshoná. Kòrsou ta brinda mas di 65 lokalidat kaminda por praktiká buseo òf snòrkel. Kada sitio ta úniko den su sorto, tin su propio beyesa i variashon di koló. CTB ta gradisí tur skol di buseo i partnernan den sektor privá ku a forma parti di e tim di Kòrsou na ‘Duikvaker’.
