WILLEMSTAD- 10 di mei 2016 – Resientemente Ofisina di Kòrsou (CTB) i Fundashon Bon Intenshon (FBI) a presentá e próksimo edishon di Curaçao North Sea Jazz Festival (CNSJF) na partnernan den turismo, prensa kolombiano i algun invitado spesial. E presentashon na prensa kombiná ku un evento a tuma lugá na Hotel W, Bogotá. E entusiasmo di parti di medionan di komunikashon pa e enkuentro musikal ku próksimamente lo tuma lugá, tabata notabel. CNSJF a logra un posishon sólido den e kalendario di evento, no únikamente na Kòrsou pero den henter region.
Ademas di ta e evento musikal di mas grandi, e ta importante pa turismo di Kòrsou. Percey Pinedo bosero pa FBI i CNSJF a habri e enkuentro ku prensa bisando, “Ta un honor pa presentá Colombia un otro edishon di Curaçao North Sea Jazz. E aña aki un biaha mas ta konta ku artistanan di taya, manera Juan Luis Guerra, Lenny Kravitz, Tom Jones i pa promé bes lo tin un dósis di reggaetón presentá dor di e kolombiano J. Balvin”.
Na final di e enkuentro ku prensa a sigui un evento ku a konta ku un presentashon di Randal Corsen & Band. E trio di jazz, ku riba perkushon Pernell Saturnino, ganadó di un premio Grammy, Eric Calmes riba su bass i Randal Corsen riba su piano a sá di impreshoná representantenan di medionan di komunikashon ku tabata presente.
E aña aki ta e di shete edishon di CNSJF, ta premirá atrobe un impulso ekonómiko grandi den sektor turístiko. E konsiertonan sigur lo pèrkurá pa un gran kantidat di bishitante for di den region. Gran mayoria ta yega Kòrsou 2 pa 3 dia promé ku e anochinan di CNSJF.
