WILLEMSTAD- 23 mei 2016– Ofisina di Turismo di Kòrsou (CTB) ta introdusí un programa di sertifikashon dirigí riba sektor di hospitalidat i turismo. E ophetivo di e programa aki ta pa promové i mantené kalidat di empresanan ku ta ópera den industria di hospitalidat i turismo.
Komo parti di e programa, empresanan den industria di hospitalidat i turismo ta risibí un ouditoria basá riba stándartnan di kalidat rekonosé den nos merkado lokal i tambe internashonalmente. Curaçao Innovation & Technology Institute (CITI) ta enkargá ku ehekushon di e programa di sertifikashon. Aworakí ta start ku ouditoria pa apartamentu ku ta keda di hür ku turista i restorant. Despues lo sigui pa otro sektornan den industria di turismo manera: tour bus, buseo, taksi i car rental.
Despues di pasa e programa di ouditoria ku éksito e empresa ta keda sertifiká i inkluí den CTB su programa di merkadeo. E kontròl di kalidat lo sosodé kada 2 aña dor di CITI. Den e próksimo simannan CTB lo bai aserká e diferente empresanan pa asina motivá i insentivá nan pa partisipá na e programa.
Pa ehekushon di e programa di sertifikashon a krea un página spesial riba e wèpsait di CTB ku ta kontené tur informashon di e programa. E empresa por yena ‘online’ e formulario di partisipashon na e programa di sertifikashon. Despues di esaki ta risibí un kódigo ku kual por haña akseso pa por ‘upload’ informashon relevante i tambe haña un bista di e status di sertifikashon di e empresa konserní. Pa mas informashon bai riba www.curacao.com – ‘Corporate’ i klik riba ‘Certification Program Hospitality and Tourism Industry’.
