…E impakto ekonómiko generá ta 395 mion florin…
WILLEMSTAD- 29 di yüni 2016 – Na inisio di e temporada abou den turismo, Ofisina di Turismo di Kòrsou (CTB) ta reportá un bahada den kantidat di turista di estadia na luna di mei. Sifranan preliminar kolektá pa CTB ta indiká ku pa luna di mei 2016 a registrá un bahada di 8%. Esaki ta un total di 2.689 turista ménos. Un total di 30.932 turista di estadia a keda registrá kompará ku 33.621 turista na mesun luna aña pasa. E bahada den kantidat di turista di estadia ta komo konsekuensia di bahada for di tur region. Mei ta konosí komo un di e lunanan di e temporada abou pa loke ta trata e kantidat di turista ku ta bishitá Kòrsou.
Europa, e region for di kua nos ta risibí mas tantu turista ta representá un kantidat signifikante di 45.3% di tur bishitante na luna di mei 2016. Aña pasa esaki tabata 44.6%. For di e region aki Kòrsou a risibí 14.013 turista kompará ku 14.981 na mei 2015. Hulanda, e pais for di kua nos ta risibí mas tantu turista a nota un bahada di 7% ku un total di 11.106 turista na mei 2016 kompará ku 11.991 na 2015. Alemania a keda stabil na luna di mei. Un total di 1.558 turista a keda registrá. For di Bèlgika un kresementu di 14% a keda registrá, den sifranan apsoluto ku ta un total di 355 turista di estadia.
Region di Sur Amérika a konosé un bahada di 16% ku un total di 7.401 turista di estadia kompará ku 8.760 na 2015. For di Venezuela un kantidat di 4.353 turista a keda registrá, reflehando un bahada di 21%. Brazil i Colombia tur dos a registrá kresementu di respektivamente 20% i 22%. Colombia ta esun ku ta demostrando mas stabilidat kompará ku otro merkadonan importante den Sur Amérika manera Venezuela i Brazil.
Turismo di estadia for di Nort Amérika a registrá un bahada di 16% na mei ku un total di 5.068 kompará ku 6.056. Estado Unídos a registrá un total di 4.428 turista kual ta 13% ménos turista. Canada a registrá un bahada di 34% ku 640 turista di estadia na luna di mei 2016. E bahadanan aki ta un refleho di e temporada abou di turismo. Aktualmente konforme e rekomendashonnan stratégiko di e Plan Maestro pa Turismo 2015 – 2020, sektor di turismo ta desaroyando plannan riba término kòrtiku i largu ku e meta pa aselerá e kresementu di turismo for di region di Nort Amérika partikularmente Estado Unídos.
E kantidat di anochi ku e turista a keda riba nos pais a konosé un bahada di 11%. Un total di 237.251 anochi a keda registrá na mei 2016. Region di Europa ta representá 60.3% di kantidat total di anochi ku e turista a keda nos pais. For di Europa un total di 143.058 anochi a keda registrá. Region di Nort Amérika i Sur Amérika tur dos a registrá 26% ménos kantidat di anochi kompará ku mei 2015. E kantidat averahe di anochi ku e turistanan a keda den luna di mei ta 7.7 anochi miéntras aña pasa esaki tabata 7.9 anochi.
Sifranan promé 5 lunanan di aña: kantidat di anochi, akomodashon i impakto ekonómiko
E promé sinku lunanan di aña 2016 ta mustrando un kresementu kumulativo di 2% den kantidat di turista di estadia. E kresementu aki por keda atribuí prinsipalmente na e prestashon di e region di Europa, Nort Amérika i Karibe den e periodo di yanüari pa mei. E region di Europa ta esun ku a registrá mas kresementu ku 8%, Nort Amérika a keda stabil i Karibe a konosé un bon prestashon di 3%. Region di Sur Amérika a konosé un bahada registrando 8% ménos turista. E kantidat di anochi ku e turistanan a keda nos pais e promé sinku lunanan di 2016 ta mustra un bahada di 7%. Sifranan preliminar ta mustra un total di 1.536.083 anochi. Aña pasa e kantidat tabata 1.645.269. Europa ta e úniko merkado ku a nota kresementu durante e promé 5 lunanan di aña 2016. Un total di 910.319 anochi a keda registrá kual ta un kresementu di 2%. Nort Amérika, Sur Amérika i Karibe a registrá un bahada di respektivamente 6%, 25% i 11% ménos kantidat di anochi durante e promé 5 lunanan di aña.
For di e karchinan di embarkashon i desembarkashon por konstatá ku 56% (109.701 turista) di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (27%), hotèl ku ménos ku 150 kamber (12%) i bùngalo (18%). E kantidat di turista ku a keda na otro akomodashon ta 86.193. Esaki ta representá 44% di e kantidat total di turista di estadia.
Hasiendo uso di e modelo ‘Turistika’, CTB huntu ku MEO a kalkulá ku durante e sinku lunanan di 2016, sektor di turismo a generá un impakto direkto di 395 mion florin pa nos ekonomia lokal. Turistanan prosedente for di Europa a generá un total di 198 mion florin kual ta 50.2% di e totalidat. Su tras ta sigui esnan for di Nort Amérika ku 94 mion i Sur Amérika ku 79 mion. E entrada generá for di e sobra turistanan a keda kalkulá na 24 mion florin.
Stayover arrivals May 2016
Por download e ‘Tourism Insight active report’ via di e link aki. E ‘Tourism Insight active report’ ta proveé datonan importante i estadístika riba turismo di Kòrsou.
