Willemstad – 16 di sèptèmber 2016 – Resientemente Ofisina di Turismo di Kòrsou (CTB) a organisá espesialmente pa sektor di enseñansa un presentashon di e Plan Maestro di Turismo. Meta di e presentashon aki tabata pa duna informashon di e plan i di otro banda deliberá huntu kon por inkorporá turismo den sektor di enseñansa. E presentashon a keda duná pa sr. Vincent Vanderpool-Wallace ku ta esun enkargá ku kordinashon di e trayekto di implementashon di e Plan Maestro di Turismo.
Durante e presentashon a duna informashon di entre otro; kresementu di turismo, e posibilidatnan amplio ku e sektor ta ofresé pa loke ta trata trabou i tambe e benefisionan ekonómiko pa nos pais. A diskutí tambe kon por logra un mihó komprondementu i apresio pa turismo den skolnan. Mas aleu a para ketu na kon por inkorporá turismo den materianan eksistente den skolnan. Pues aki no ta trata di trese kambio den e kuríkulo di skolnan pero pa stimulá pa hasi uso di konseptonan relashoná ku turismo den materianan eksistente den skol. Esaki por ta un promé stap pa logra turismo drenta skol.
CTB ta gradisí tur e dosentenan, representantenan di sektor priva i tambe miembronan di prensa ku tabata presente i a kontribuí ku ideanan kon pa logra mas konsientisashon riba e importansia di turismo na skol.
