…CTB ta lansa kampaña di konsientisashon…
Willemstad – 19 di sèptèmber 2016 – Dia 27 di sèptèmber próksimo rònt mundu ta selebrá Dia Mundial di Turismo. Riba e dia aki ta para ketu na krea konsiensia riba importansia di turismo i su balor sosial, kultural, polítiko i ekonómiko. E aña aki, mundu lo selebrá e dia ku un tema komun, “Tourism for All”. CTB lo usa e tema aki komo un plataforma pa kòrda nos komunidat riba e importansia di nan partisipashon den nos industria turístiko. Pa duna inisio na e kampaña di konsientisashon aki Minister di Desaroyo Ekonómiko, sr. Eugene Rhuggenaath a desvelá un billboard i konvoi ku ta ilustrá e tema “Tourism For All” esta “Turismo Pa Nos Tur”.
Durante di e trayekto di preparashon a invitá empleadonan di 34 organisashon pa nan ta kara di e kampaña di konsientisashon ‘Turismo Pa Nos Tur’.E diseño aki lo bai keda proyektá riba diferente billboard riba nos isla di kual e promé a keda desvelá i ta ubiká na Mohikanenweg enfrente di Goisco. Tambe a laga wrap un konvoi grandi di ABC Bus bedrijf ku e mesun diseño gráfiko. Tantu e billboard komo e konvoi lo karga e tema di Dia Mundial di Turismo di e aña aki kual ta ‘Turismo Pa Nos Tur’. Ku esaki un bes mas ta suprayá e importansia di partisipashon di nos komunidat den nos industria di turismo. Ta trata aki tantu di esnan ku ta partisipá di manera aktivo den e industria dor ku nan ta laborá na un instansha turístiko pero tambe esnan ku no direktamente ta laborá den e sektor turístiko, pero ku sí ta aportá via di un bon komportashon, kordialidat i duna un bon servisio na e eksperensia total di e bishitante.
