WILLEMSTAD- 6 di desèmber 2016 – Sifranan preliminar kolektá pa Ofisina di Turismo di Kòrsou (CTB) ta indiká un kresementu di 3% durante e promé 10 lunanan di aña 2016, esaki lagando afó e impakto negativo di Venezuela riba e kantidat di turista risibí durante e aña aki. E kantidat di bishitante registrá for di pais bisiña Venezuela a mustra un bahada e aña aki kousando un impakto negativo riba nos prestashon total. Pa e promé 10 lunanan di aña Venezuela a registrá un total di 20.697 turista ménos kompará ku aña pasá kual ta un bahada di 28%.
Un total di 367.339 turista a keda registrá di yanüari pa òktober 2016, esaki ta un bahada di 3% kompará ku aña pasa. Europa a krese ku 5% yegando na un total di 170.732 turista di estadia pa e promé 10 lunanan di aña 2016. Region di Europa ta representá 46.5% di e total di turista ku a bishitá Kòrsou. Sobra regionnan esta Nort Amérika i Karibe a registrá un bahada di respektivamente 3% i 1% durante e promé 10 lunanan di aña 2016. Den sifranan apsoluto ta trata di respektivamente 64.100 i 28.288 turista di estadia.
CTB i MEO ta hasi uso di e modelo ‘Turistika’ pa kalkulá e kresementu ekonómiko generá for di industria di turismo. Durante e promé 10 lunanan di 2016, sektor di turismo a generá un impakto direkto di 757.1 mion florin pa nos ekonomia lokal. Turistanan prosedente for di Europa a generá un total di 392.6 mion florin kual ta 51.9% di e totalidat. Nort Amérika, Sur Amérika i otro regionnan a generá respektivamente 154.2, 159.1 i 51.3 mion florin.
Turismo di estadia na luna di òktober 2016
Region di Europa, a raportá un kresementu di 6% den kantidat di turista di estadia na òktober 2016. E kresementu aki ta representá un total di 407 turista mas kompará ku aña pasá. Den sifranan apsoluto ta trata di un total di 18.187 turista. Hulanda, e pais for di kua nos ta risibí mas tantu turista a registrá un kresementu di 3% ku un total di 13.515 turista di estadia. For di Alemania un kresementu di 12% a keda registrá. E esfuersonan di merkadeo kontinuo den e dos paisnan aki ta mustrando resultadonan positivo e último lunanan.
For di region Karibe nos a risibí 3.194 turista ku ta un bahada di 7% na òktober 2016. E kantidat di turista di estadia for di Aruba i Trinidad & Tobago tabatin un impakto negativo riba e resultadonan total di luna di òktober. Di otro banda Repúblika Dominikana, Haiti i Jamaica a raportá kresementu di respektivamente 4%, 88% i 16% kompará ku òktober 2015.
Kòrsou a risibí 4.583 turista di estadia for di Nort Amérika na òktober 2016. Òktober ta konosí komo un luna slo pa loke ta trata turista for di Nort Amérika. Canada a registrá 3% mas turista na òktober 2016 kompará ku òktober 2015. Turistanan for di Estádos Unídos a baha ku 16% kompará ku òktober 2015. For di Estádos Unídos por mira un kresementu for di e region di New York komo resultado di e kampaña di ‘Right Now In Curaçao’. E bahada den kantidat di turista for di Estádos Unídos ta pa motibu di ménos kapasidat di stul for di e otro regionnan for di kual nos ta risibí turista.
Region di Sur Amérika a konosé un bahada di 53% ku un total di 6.964 turista kompará ku 14.693 na aña pasa. Venezuela ku un total di 3.206 turista a registrá un bahada di 71% kompará ku aña pasá. E demanda for di Colombia i Brazil ta kresiendo. Colombia a registrá un kresementu di 13% ku un total di 1.098 turista kompará ku 969 na aña pasa. Brazil a registrá un kresementu di 39%. Un total di 894 brasilero a keda risibí na luna di òktober 2016 kompará ku 644 na aña pasa.
Sifra kantidat di anochi
Na òktober nos a registrá un kresementu averahe den kantidat di anochi pa estadia di 18%. Turistanan a keda un averahe di 8.2 anochi pa persona na òktober 2016. Aña pasa e kantidat averahe pa persona tabata 6.9. E kantidat di anochi ku e turista a keda riba nos pais na òktober 2016 si a konosé un bahada leve di 2%. Un total di 279.603 anochi a keda registrá kompará ku 286.537 na aña pasá. Esaki ta komo resultado di e bahada den kantidat di turista di estadia. Pa sobra di 2016 e pronóstiko ta positivo. E reservashonnan pa loke ta trata e merkadonan prinsipal ta mustra prometedor. Nos ta spera un kresementu positivo for di Hulanda, Bèlgika, Alemania, Colombia i Estádos Unídos pa e próksimo kuartal.
