…Kampaña di konsientisashon di CTB…
WILLEMSTAD- 20 di desèmber 2016 –Resientemente e kampaña di konsientisashon Dushi Hende t’ Ami; Mi ta ON! dirigí spesialmente riba hóbennan entre 12 i 19 aña, a hasi entregá di sertifikado na un grupo di 536hóben. Meta di e proyekto aki tabata pa hasi e hóbennan konsiente di e importansia di desaroyo di turismo na Kòrsou i tambe di nan embolbimentu den e desaroyo aki. E kampaña a konsistí di 6 proyekto. Implementashon di e proyektonan a tuma lugá di yüni pa desèmber 2016. Minister enkargá ku Desaroyo Ekonómiko, sr. Eugene Rhuggenaath tabata presente pa asina otorgá sertifikado na e hóbennan.
E kampaña a konsistí di e siguiente 6 proyektonan: 1) un kompetensia di saka potrèt kaminda e hóben mester a ilustrá kon e ta mira desaroyo di turismo den su pais. 2) Un konferensia pa hóbennan di Scouting i AGPNA riba tópikonan relashoná ku desaroyo di turismo. 3) Diferente workshop i seshonnan di informashon riba e balornan básiko pa por traha den sektor di turismo. Esakinan a keda duná dor di hóbennan di VSBO i SBO na alumnonan di Skolnan di Fundeshi. E hóbennan a keda di coach pa personanan ku ta laborá den sektor di turismo. 4) Partisipashon na Studie en Beroepenmarkt 2016 kaminda a duna informashon na e hóbennan tokante desaroyo di turismo i posibilidat di trabou den e sektor aki. 5) Seshon di informashon interaktivo riba turismo dirigí riba hóbennan di VSBO i 6) Tour pa hóbennan di Naschoolse Opvang konosé diferente atrakshon turístiko aki na Kòrsou.
E proyekto a keda finansiá pa Reda Sosial, ku fondo di Gobièrnu di Kòrsou. Ofisina di Turismo di Kòrsou (CTB) tambe a kontribuí finansieramente na e proyekto i huntu ku Fundashon Nos Kousa tabata enkargá ku ehekushon di e proyekto. Un danki ta bai na tur organisashon, skolnan, Naschoolse Opvang, representantenan di sektor priva i tur personanan ku di un òf otro manera a kontribuí na éksito di e kampaña di konsientisashon Dushi Hende t’ Ami; Mi ta ON!.
