WILLEMSTAD– 26 di desèmber 2016 – Resientemente Ofisina di Turismo di Kòrsou (CTB) a rekonosé partnernan den industria inkluyendo agensianan di biahe, aerolíneanan i operadornan di tour ku a duna nan sosten i a sa di kordiná kampañanan promoshonal di Kòrsou den e merkado Brazilero ku éksito. E rekonosementu a keda duná dor di CTB komo muestra di apresio pa nan trabou duru i dedikashon.
CTB su agensia publisitario, Twist & Shout huntu ku Spring, e agensia enkargá ku e parti di relashon públiko pa e merkado di Brazil tabata anfitrion di partnernan den industria manera entre otro, operadornan di tour, CVC, Flytour Viagens, New Age i Orinter & Sanchat. E evento a tuma lugá na e restorant Figueira Rubaiyat na São Paulo. InselAir, Avianca i Copa Airlines tambe tabata presente. ‘Double Task’, Kòrsou su representante na Brazil kende ta e punto di kontakto ku diferente partner na Brazil tambe tabata presente. E seremonia a keda kubrí dor di diferente medio di komunikashon manera Alpha FM, Antena 1, CARAS Magazine, Mercado & Eventos, O Estado de São Paulo, PANROTAS, Viagem e Turismo Magazine i e programa di televishon Brazilero di Amaury Jr. i Alvaro Garnero ku tambe tabata presente na e evento pa risibí nan rekonosementu pa nan kontribushon na promoshon di Kòrsou na Brazil.
Durante di e evento aki, sr. Toni Sando, presidente di São Paulo Convention & Visitors Bureau a rekonosé e partnership entre Kòrsou i São Paulo Convention & Visitors Bureau i a mustra riba e éksito di e kampaña publisitario di Kòrsou durante 2016. Di akuerdo ku e último estadistikanan, e resultado di e esfuersonan di merkadeo di CTB durante 2016 a resultá den un kresementu positivo di bishitante for di Brazil.
