WILLEMSTAD- 22 di febrüari 2017 – Resientemente Ofisina di Turismo di Kòrsou (CTB) ku ta enkargá ku kordinashon di e aria di rekreo na Marie Pampoen a organisá un enkuentro pa asina duna informashon di e progreso i resultado di e proyekto na e Ministernan konserní. E proyekto ta un inisiativa di Ministerio di Desaroyo Ekonómiko huntu ku Ministerio di Tráfiko, Transporte i Planifikashon Urbáno i Ministerio di Salubridat Públiko, Medio Ambiente i Naturalesa. E enkuentro a konta ku presensia di Ministernan demishonario Eugene Rhuggenaath kompaña pa Minister Zita Jesus Leito i Minister Suzy Camelia Römer i diferente representante di e ministerionan menshoná. Durante di e atardi esnan presente a haña splikashon di parti di representantenan di CTB i di Heren2 Caribbean B.V. ku ta e kompania ku ta asistí CTB ku e partinan tékniko di e proyekto. Na e okashon, Minister Camelia Römer a presentá tambe e pèrmit pa por kontinuá ku e di dos fase di e proyekto Desaroyo Aria di Rekreo Marie Pampoen.
Na aña 2015 a enkargá CTB ku desaroyo di e aria di rekreashon Marie Pampoen. Despues di risibí tur e pèrmitnan nesesario konstrukshon di e aria parti Wèst a kuminsá na aña 2016. E parti aki ta inkluí un aria di parkeo, un playa riba tera, 2 palapa, fasilidat pa barbeque i piknik, un kaminda pa kana i kore, matanan pa sombra i dekorashon, iluminashon i adaptashon di e asera na Dr. M.L. King Boulevard. E konstrukshon di e fase aki ta yegando su parti final. E intenshon ta pa despues di kulminashon di e e parti aki start mas lihé ku ta posibel ku e trabounan na e aria di deporte eksistente ku lo tin ku haña un “face lift” supstansial.
CTB i demas partnernan den e proyekto ta gradisí tur usuario i spesialmente habitantenan di Marie Pampoen pa e komprenshon i pasenshi pa kualke molèster ku e trabounan por kousa i ta kòrda tur usuario ku ta únikamente huntu nos por pèrkurá pa e aria aki keda mantené komo un lugá agradabel pa nos hendenan i turistanan por rekreá .
