WILLEMSTAD- 21 di mart 2017 – Resientemente a tuma lugá firmamentu di un protokòl di koperashon pa 5 aña dirigí riba mehorashon i mantenshon duradero di 8 playa públiko. E protokòl a keda firmá entre Ministerio di Desaroyo Ekonómiko, Ministerio di Salubridat Públiko, Medio Ambiente i Naturalesa, Ministerio di Desaroyo Sosial, Labor iBienestar,Ministerio di Tráfiko, Transporte i Planifikashon Urbáno i Ofisina di Turismo di Kòrsou (CTB). E proyekto ta enserá ku lo forma un komishon konsistiendo di representantenan di e ministerionan menshoná i CTB ku lo mester bai traha huntu riba ehekushon di diferente tarea den kuadro di mehorashon i mantenshon di e siguiente 8 playanan: Caracasbaai, Daaibooi, Sta. Cruz, Jeremi, Kenepa Chikí, Playa Fòrti, Playa Lagun i Kenepa Grandi.
Den kuadro di formulashon di e proyekto a traha primeramente riba inventarisashon di e situashon aktual kaminda a identifiká e arianan ku lo mester keda optimalisá. Ta trata aki di e siguiente arianan: e aspekto di higiena, kontrol sosial, bahamentu di kriminalidat riba e 8 playanan, seguridat di e bishitantenan di e playa tantu personanan lokal komo nos bishitantenan for di eksterior, mihó fasilidatnan di tualèt, baño i aria di parker, modifikashon di e infrastruktura teniendo kuenta ku e nesesidatnan di esnan di edat avansá i tambe esnan ku tin un desabilidat físiko, krea trabou pa nos hendenan lokal i yega na mas entretenementu riba e playanan. Un aspekto hopi importante den kuadro di ehekushon di e proyekto aki ta e parti sosial, kaminda lo duna entrenamentu na diferente persona ku lo bai traha riba e playanan aki. Pues e proyekto aki lo krea diferente kupo di trabou nobo, i lo duna tambe oportunidat pa entreprenùr por hasi negoshi.
Implementashon di e proyekto aki lo mester sòru pa un kambio den e eksperensia total ku ta keda brindá na e diferente playanan kual sigur lo tin su influensia positivo riba e produkto turístiko den su totalidat.
