…Kòrsou ku otro akshon inovativo…
WILLEMSTAD – 17 mei 2017–Atrobe Kòrsou tabata sentro di atenshon den merkado brasilero na momento ku a lansa un eksposishon di fotonan gigantesko di Kòrsou na e aeropuerto di Manaus. E fotógrafo profeshonal Celio Said a saka diferente foto na Kòrsou i a eksponé un kantidat di 70 foto den forma di un tapeit den e área di check-in na e aeropuerto di Manaus.
E kolekshon di foto ku a keda eksponé riba e flur den e área di check-in tin un largura di 190 meter i un hanchura di mas o ménos 3 meter. Esaki ta krea un impreshon impaktante di e paisahenan di mas impreshonante di Kòrsou. Meta final di e eksposishon aki ta pa krea kuriosidat i di e manera ei generá e gana serka e biaheronan pa bishitá Kòrsou. E aktividat aki ta algu úniko i inovativo kual pa promé biaha a keda hasí na kualke aeropuerto na Brazil. E potrètnan ta mustra e diversidat di Kòrsou ku su playanan, sentro di siudat i e diferente atrakshonnan ku Kòrsou ta ofresé turistanan. Huntu ku e eksposishon a lansa tambe un revista ku informashon di Kòrsou su produkto turístiko. Riba portada di e revista tin un potrèt di Miss Kòrsou 2016, srta. Chanelle De Lau. E revista aki ta keda repartí den e área di check-in durante e orarionan ku tin mas tráfiko na e aeropuerto.
Ofisina di Turismo di Kòrsou (CTB) ta hopi kontentu ku e reakshonnan ku e eksposishon aki a haña den e merkado brasilero ku kobertura den korantnan lokal na Manaus i na televishon. Tambe e marka di brel, JoliJoli a lansa un kolekshon di brel bou di e nòmber Curaçao kual lo keda promové den nan kampaña ku imágennan di Kòrsou, durante e lunanan benidero. Representantenan di JoliJoli tambe tabata presente na e lansamentu di e eksposishon di foto kaminda nan a eksponé nan modèlnan di brel bou di e kolekshon Curaçao. E intenshon ta pa via di e diferente aktividatnan aki krea mas interes serka e brasilero pa biaha pa Kòrsou.
