WILLEMSTAD – 26 di yüni 2017 – Resientemente Ofisina di Turismo di Kòrsou (CTB) a organisá e di dos workshop di ‘Social Media and Content Marketing’ pa partnernan den sektor privá ku e meta pa alsa e nivel di konosementu di e posibilidatnan ku merkadeo online ta brinda. A para ketu entre otro na aspektonan ku por yuda e sektor pa saka lo máksimo for di plataformanan sosial manera entre otro Facebook i tambe kon pa stimulá uso di un produkto òf servisio hasiendo uso di diferente hèrmènt online. E aña aki e workshop a konta ku un total di 80 partisipante. E partisipantenan a inkluí entre otro representantenan di: hotèl, restorant, atrakshonnan turístiko, sektor públiko i otro entidatnan ku ta aktivo den e industria di turismo i riba medionan sosial. Minister di Ekonomia, Dr. Steven Martina a trese un palabra di bon bini na apertura di e workshop i a enfatisá; si kolektivamente nos por logra na implementá ideanan i teknologianan nobo, Kòrsou i kada negoshi lo progresá.
E workshop a keda duná pa dos fasilitado, sr. Mike Brown fundadó di Brainzooming Group i Alex Greenwood di AGPR. Brainzooming Group, ta un kompania ku ta enfoká riba yuda klientenan krea impakto stratégiko i resultadonan ekstraordinario. AGPR ta spesialisá den e aria di komunikashon i merkadeo. E workshop a keda repartí den 3 seshon. Sr. Brown ku tabat’ei aña pasá tambe a start e promé seshon dunando un bista di e puntonan mas importante ku a keda tratá aña pasá. Tambe a para ketu na kon pa atraé e grupo di enfoke ideal pa kada produkto spesífiko. Durante di e di dos seshon a elaborá riba kon pa usa Facebook pa merkadeo online di manera efektivo i efisiente. E último seshon a duna esnan presente strategianan ku por keda usá pa reforsá esfuersonan di merkadeo online.
CTB ta kontentu ku e partisipashon aktivo di esnan presente i ta spera ku kada partisipante lo hasi bon uso di e konosementu atkerí na benefisio no solamente di nan negoshi pero pa e industria di turismo den su totalidat.
