WILLEMSTAD – 6 di yüli 2017 – Ku e meta pa ekspandé i oumentá bishitanan for di Nort Amérika, Ofisina di Turismo di Kòrsou (CTB) a djòin ku Apple Vacations, American Airlines i tambe partnernan den sektor privá pa lansa un kampaña promoshonal di Kòrsou na Chicago. Tambe a organisá diferente seminario pa eduká e mihó agentenan di biahe riba e produkto ku Kòrsou ta ofresé.
Resientemente, e tim di Kòrsou tabata anfitrion di vários seminario edukativo na diferente siudat di Illinois den kual a promové Kòrsou komo un destinashon tòp den region Karibe. Aproksimadamente 250 agente di biahe a partisipá na e seminarionan aki. Un biaha mas CTB por a konta ku diferente partner den sektor privá, entre nan Avila Beach Hotel, Floris Suite Hotel – Spa & Beach Club, Hilton Curaçao, Papagayo Beach Curaçao, Renaissance Curaçao Resort & Casino i Sunscape Curaçao Resort Spa & Casino.
Adishonalmente CTB a lansa tambe e kampaña “Right Now In Curaçao” pa merkado di Chicago. A skohe pa un aserkamentu integrá na Chicago kaminda ta kombiná diferente aspekto di merkadeo ku e meta pa krea mas konosementu di Kòrsou su produkto turístiko. E kampaña “Right Now In Curaçao” por keda mirá riba diferente billboard i tambe na vários stashon di trein. Ademas di esaki, CTB a logra mantené su kampaña publisitario na televishon, ku e promoshon di Kòrsou pasando na kanal ABC 7 na Chicago i e plataforma integrá ku Time Out Chicago ku ta inkluí, kobertura den prensa, un guia digital i eventonan pa konsumidó. E kampaña di CTB na Chicago lo ta vigente te ku ougùstùs 2017.
