WILLEMSTAD- 31 di yüli 2017 – Dia 31 di yüli último, Fundashon Kas di Kultura Kòrsou i Ofisina di Turismo di Kòrsou (CTB) a firma un akuerdo di koperashon den kual e dos instansianan ta ekspresá e disponibilidat pa traha di forma mas estrecho ku otro na bienestar di nos pais Kòrsou. E akuerdo di koperashon ta basá riba diferente punto di salida kualnan ta forma e base pa e áreanan di koperashon ku e dos instansianan a palabrá. Firmamentu di e akuerdo importante aki a tuma lugá den un ambiente ameno den presensia di miembronan di direktiva i trahadónan di tur dos instansia. Na firmamentu di e akuerdo a hiba palabra sra. Altagracia Bryson, Presidente di Direktiva di Fundashon Kas di Kultura Kòrsou, sra. Emly Francisca, Direktor di Fundashon Kas di Kultura Kòrsou i sr. Hugo Clarinda, Direktor Interino di CTB.
Herensia kultural ta un ingrediente importante di e produkto turístiko di Kòrsou ku kual nos isla ta distinguí su mes. Di mes manera, turismo ta yuda kontribuí na preservashon di nos herensia kultural. Tantu e Plan Maestro di Turismo komo e Plan di Maneho di Kultura ta rekonosé e ròl importante di kultura den desaroyo di e produkto turístiko. E dos instansianan ta rekonosé ku promoshon turístiko di Kòrsou den eksterior mester konsentrá su mes entre otro riba e herensia kultural di Kòrsou. P’esei ta sumamente importante pa sigui invertí den konsientisashon pa esaki bira parti integral di nos komunidat. E refleho di kultura propio den turismo ta duna Kòrsou un mihó posishon kompetitivo.
Awendia por tuma nota ku konseptonan manera Experiential Travel, esta turismo basá riba eksperensia ta birando mas i mas importante pa e bishitante. E forma di turismo aki ta konsentrá riba krea eksperensia outéntiko dor di konektá e bishitante na sitionan spesial, hende i/òf kultura di un destinashon. Proyektonan kultural ku embolbimentu di turista den barionan di Kòrsou esta Community Based Tourism ta otro konsepto kaminda turismo i kultura ta topa otro. Ta imperativo pa nos kada unu, trahadónan den turismo i kultura pero tambe e pueblo en general por ta un bon embahador di turismo, kultura i Kòrsou en general. Solamente huntu nos por logra yega na mas desaroyo pa nos pais.
Algun di e áreanan di koperashon ku CTB i Fundashon Kas di Kultura Kòrsou a yega na dje ta entre otro: organisashon di tayernan entre e dos instansianan, identifiká sitionan, eventonan i otro puntonan di interes kultural, formashon kultural i turístiko pa e empleadonan, trahadónan den sektor di turismo i artistanan, presentashon na aktividatnan turístiko i kultural, inkluí aspektonan di kultura i turismo den kurso i tayernan organisá pa e dos instansianan i tambe Siman di Kultura i Siman di Turismo.
