WILLEMSTAD- 15 di sèptèmber 2017 – E filosofia, ‘Servisio na promé lugá’ ta kore manera un liña kòrá den organisashonnan ku tin aserkamentu diario ku turista. Pa e motibu aki ta importante pa sigui traha pa alkansá ekselensia di manera ku Kòrsou por ofresé un nivel haltu di servisio. CTB den koperashon ku CHATA a ofresé hotèlnan miembro di CHATA un oportunidat úniko di sigui un programa di entrenamentu ku enfoke riba servisio na kliente. E entrenamentu diseñá dor di Teamwork Curaçao spesialmente pa nos merkado, ta keda ofresé grátis dor di CTB na empleadonan ku tin kontakto direkto ku e turista, aki por pensa riba personal di front desk, reservation office i otro departamentunan.
E idea primario ta pa den forma inmediato oumentá e nivel di servisio i eksperensia di nos huéspetnan i sigui fortifiká nos produkto turístiko. E programa ta dividí den 5 parti: Eksperensia di e Kliente, Komunikashon ku e Kliente, Sorpresá bo Kliente, E Kliente Difísil i finalmente E Kliente Diferente. E programa di entrenamentu ta sigui te ku dia 6 di òktober próksimo ita keda duná den forma teorétiko i práktiko. E seshonnan práktiko ta keda duná na e hotèlnan partisipante ku ta: Livingstone Jan Thiel Resort, Rancho El Sobrino, Papagayo Beach Hotel, Lions Dive & Beach Resort, Papagayo Beach Resort, Bon Bini Seaside Resort, Sunscape Curaçao Resort, Spa & Casino, Avila Beach Hotel, Baoase Luxury Resort i Santa Barbara Beach & Golf Resort.
CTB ta deseá tur partisipante hopi éksito. Huntu nos lo hiba nos produkto turístiko na un próksimo nivel!
