…Den e promé 8 lunanan di aña…
WILLEMSTAD – 21 di sèptèmber 2017 – Turismo a produsí un impakto direkto di 609 mion florin pa nos ekonomia lokal di yanüari pa ougùstùs 2017. Un total di 53.6% di e impakto direkto ta keda generá for di bishitantenan di Europa; nan ta responsabel pa 326 mion florin. Aña pasá durante di e mesun periodo bishitantenan prosedente di Europa a generá 316 mion florin. Esaki ta un kresementu di 3%. For di Nort Amérika un kresementu di 4% a keda registrá pa loke ta trata e impakto ekonómiko direkto ku turismo tin riba ekonomia lokal. Bishitantenan for di Nort Amérika ta responsabel pa 139 mion florin pa loke ta trata e promé 8 lunanan di e aña aki, aña pasá e region aki a kontribuí ku 133 mion florin. Sur Amérika i otro regionnan a generá respektivamente 108 i 36 mion florin e aña aki. Na 2016 Sur Amérika i otro regionnan a generá respektivamente 129 i 41 mion florin. E total di loke e turista a gasta ta keda derivá for di e kantidat di anochinan ku nan a keda na Kòrsou. Tantu e bishitantenan for di Europa komo esnan for di Nort Amérika ta kedando mas largu na Kòrsou, esaki ta keda reflehá bèk den nan kontribushon pa nos ekonomia lokal.
262.065 bishitante a keda risibí na Kòrsou durante di e promé 8 lunanan di 2017. Aña pasá a registrá 299.857 bishitante durante e mesun periodo, esaki ta un bahada di 13%. Apesar di e prestashon negativo di dos sifra den e sifranan di yegada pa e promé 8 lunanan, tòg ta mira un bahada leve di 3% den e kantidat di anochinan ku e turista a keda riba nos isla. Total bishitantenan a keda 2.364.878 anochi na Kòrsou.
63.5% di e kantidat di anochi ku e bishitante a keda nos pais ta di bishitantenan for di Europa, representando 1.501.143 anochi for di e region aki entre yanüari i ougùstùs 2017. Total un kresementu di 3% den kantidat di anochi a keda registrá pa bishitantenan for di Europa. For di Nort Amérika, tambe e kantidat di anochi pa bishitante a krese ku 3%. Un total di 371.854 anochi a keda registrá durante di e promé 8 lunanan di aña.
Turismo di estadia na luna di ougùstùs 2017
Na luna di ougùstùs Kòrsou a risibí un total di 12.809 bishitante for di Hulanda kual ta un bahada di 8% kompará ku ougùstùs 2016. Bishitantenan for di Hulanda a keda mas largu ku e aña anterior. E anochi averahe pa kada bishitante na ougùstùs e aña aki for di Hulanda tabata 11.6 anochi pa persona. Aña pasá ougùstùs, nos a mira ku bishitantenan for di Hulanda a keda un averahe di 11.2 anochi. E kantidat di bishitante registrá for di Alemania ta mustra un bahada di 11% ku un total di 1.526 bishitante. Na ougùstùs 2016 nos a risibí 1.708 bishitante for di Alemania. E anochi averahe pa persona for di Alemania a keda praktikamente meskos, registrando 0.3%. Aña pasá, nos a registrá un averahe di 11.6 anochi pa persona, miéntras ku e aña aki nos ta mira un averahe di 11.7 anochi pa persona.
CTB a registrá un total di 5.467 bishitante for di Nort Amérika na ougùstùs 2017. Kòrsou a risibí 749 bishitante for di Canada, registrando 12% di kresementu. For di Estádos Unídos a registrá 4.718 bishitante. E pèrdida di 183 bishitante for di Estádos Unídos ta representá un bahada di 4%.
Na ougùstùs Kòrsou a risibí ménos turista prosedente di Sur Amérika, un total di 6.294 turista di estadia a keda registrá. Esaki ta debí na e kaida kontinuo di bishitante for di Venezuela ku 62% ménos turista di estadia kompará ku aña pasá. Na ougùstùs Kòrsou a risibí 2.077 bishitante for di Venezuela. E prestashon di Colombia a resultá bon kompará ku aña pasá. Nos a registrá un kresementu di 11% pa un total di 1.239 bishitante for di Colombia. Brazil i Sürnam a registrá respektivamente 7% i 34% bahada na ougùstùs.
Na ougùstùs a registrá un kresementu den e kantidat averahe di anochi pa estadia di 12%. Turistanan a keda un averahe di 9.2 anochi pa persona na ougùstùs 2017. Aña pasá e kantidat averahe di anochi pa persona tabata 8.2. E kantidat total di anochi ku e turista a keda riba nos pais na ougùstùs 2017 a konosé un bahada di 10%. Un total di 283.521 anochi a keda registrá kompará ku 314.743 na aña pasá.
