WILLEMSTAD- 16 di òktober 2017 – Resientemente Ofisina di Turismo di Kòrsou (CTB) konhuntamente ku Curaçao Airport Partners (CAP) a tene diferente seminario di kapasitashon pa agentenan di biahe na diferente siudat den North Carolina, inkluyendo Charlotte, Greensboro i Raleigh. Propósito di e seminarionan tabata primeramente pa promové Kòrsou komo un destinashon tòp pa bishitantenan for di e área, miéntras ku ta sostené akshonnan publisitario relashoná ku e buelo semanal nònstòp ku American Airlines tin for di aeropuerto internashonal Charlotte Douglas pa Kòrsou.
Ku bista pa sigui oumentá e kantidat di bishitante for di e merkado di Nort Amérika, CTB i CAP a uni forsa ku American Airlines Vacations i tambe partnernan di sektor privá, Renaissance Curaçao Resort & Casino, Santa Barbara Beach & Golf Resort i Sunscape Curaçao Resort, Spa & Casino pa eduká e mihó agentenan di biahe di North Carolina riba Kòrsou su produkto turístiko.
Ku e resiente efektonan di horkan den Karibe, agentenan di biahe ta trahando di forma inkansabel pa asistí klientenan di kual nan plannan vakashonal den Karibe a keda afektá. Durante di e seminarionan e agentenan di biahe a ekspresá un interes nobo den Kòrsou komo parti di islanan ABC i su ubikashon den Karibe. Kòrsou awor ta un alternativa ideal pa tur ku tabatin un fakansi planiá pa aria di Karibe. Si e biahero ta konsiderando pa renobá su reservashon, Kòrsou sigur ta un opshon i nos portanan semper lo ta habrí.
