…A bishitá Medellín, Cali i Bogotá…
WILLEMSTAD- 18 di òktober 2017 – Resientemente Ofisina di Turismo di Kòrsou (CTB) kompañá pa su partnernan a bishitá Colombia kaminda a topa ku agentenan di biahe i mayoristanan na Medellín, Cali i Bogotá durante e di dos edishon di ‘Caravana’. A topa ku alrededor di 80 agente di biahe i mas di 200 mayorista. ‘Caravana’ ta un roadshow diseñá dor di Avianca pa promové un destinashon spesífiko; den e kaso aki tur atenshon tabata riba Kòrsou i su produkto turístiko.
Na Medellín i Cali a topa ku 80 agente di biahe di Avianca. E seshon di kapasitashon kombiná ku un desayuno pa e agentenan di biahe a keda masha bon risibí. Durante di e desayuno nan por a interkambiá ku representantenan di e hotèlnan ku a forma parti di e roadshow. E meta prinsipal tabata pa informá e agentenan di biahe di Avianca riba e produkto ku Kòrsou tin di ofresé i presentá diferente pakete atraktivo di e hotèlnan partisipante.
Tambe a organisá un almuerso pa mayoristanan den kual a presentá e portafolio di e hotèlnan ku a kompañá CTB durante e ‘Caravana 2017’. Alrededor di 60 mayorista a bishitá e almuerso na Medellín, 38 na Cali i 110 na Bogotá. Durante di e enkuentro a elaborá tambe riba strategianan di benta pa Kòrsou. Kòrsou a demostrá di ta un destinashon ideal pa vakashon pa turistanan for di Colombia. E partnernan ku a kompañá CTB durante di e roadshow na Colombia tabata: City Suites Curaçao, Santa Barbara Beach & Golf Resort, Papagayo Beach Hotel, Acoya Hotel Suites & Villas, Sunscape Curaçao Resort, Spa & Casino, Kura Hulanda Lodge & Beach Club i tambe Business Serenity.
