…Tur merkado prinsipal a registrá sifranan positivo na sèptèmber 2017…
WILLEMSTAD – 24 di òktober 2017 – Ofisina di Turismo di Kòrsou (CTB) ta raportá kresementu for di tur merkado prinsipal. Hulanda, Estado Unídos, Canada i Brazil tur tabatin un prestashon positivo na sèptèmber 2017. No opstante e prestashon positivo di e merkadonan prinsipal, sèptèmber a sera ku un bahada di 6%. Un total di 2.068 turista ménos a keda registrá na sèptèmber 2017 hibando e total na turista di estadia na un total di 31.094 kompará ku 33.162 na e mesun luna aña pasá. E bahada den kantidat di turista di estadia ta basá riba e echo ku e kantidat di turista for di Venezuela te ainda ta afektando e sifranan total. Un kaida di 47% a keda registrá na luna di sèptèmber. Aña pasá un total di 4.516 venezolano a bishitá nos pais miéntras e aña aki e kantidat total ta 2.403.
For di Europa a registrá un subida di 8% na sèptèmber ku un total di 16.842 europeo ku a bishitá Kòrsou. Aña pasá Kòrsou a risibí un total di 15.647 turista for di Europa. Europa ta representá 54% di e total di turista prosedente di Europa. Hulanda a registrá un subida di 9% na sèptèmber 2017. Un kantidat adishonal di 1.052 turista hulandes a bishitá Kòrsou na luna di sèptèmber. Alemania a konosé un bahada di 7% na sèptèmber 2017. Un total di 1.849 turista aleman a bishitá nos pais na sèptèmber 2017.
For di Nort Amérika por mira un kresementu di 5% na sèptèmber 2017. Un total di 4.656 turista for di Nort Amérika a bishitá Kòrsou. Nort Amérika ta representá 15% di tur e turistanan ku a bishitá Kòrsou na luna di sèptèmber. Un kantidat di 3.997 turista di estadia a keda risibí for di Estado Unídos na sèptèmber, registrando 5% kresementu kompará ku aña pasá. E oumento aki a keda registrá no opstante e diferente kanselashon di buelo di mas ku 5 dia komo konsekuensia di horkan Irma. Canada tambe a krese ku 8% na sèptèmber 2017. Kòrsou a risibí 659 kanades na sèptèmber.
Ménos kantidat di turista a keda risibí for di region di Sur Amérika, un total di 6.420 turista di estadia a keda registrá. E kaida aki ta debí na e bahada kontinuo den kantidat di turista di estadia for di Venezuela. Na luna di sèptèmber Kòrsou a risibí 2.403 turista prosedente di Venezuela kual ta 47% ménos kompará ku aña pasá. Brazil a presta bon kompará ku aña pasá. Un total di 1.031 turista di estadia a keda registrá kual ta un oumento di 2%. Komo konsekuensia di e wèlga di e pilotnan di Avianca durante e último dianan di sèptèmber a registrá un bahada di 24% den turista di estadia for di Colombia.
No opstante e echo ku sèptèmber a registrá ménos turista di estadia tòg por mira un oumento leve di 1% pa loke ta trata kantidat di anochi ku e bishitante a keda riba nos pais. Un total di 272.579 anochi a keda registrá kompará ku 268.817 na aña pasá. Tantu turistanan prosedente di Europa komo Nort Amérika a registrá sifranan positivo pa loke ta trata kantidat di anochi. For di Europa un kantidat adishonal di 8% a keda registrá miéntras for di Hulanda un oumento di 9% a keda registrá. Total turistanan hulandes a keda 142.194 anochi riba nos pais. Turistanan for di Nort Amérika a keda 30.504 anochi kual ta un oumento di 11%. For di Estado Unídos por mira un oumento di 12% ku un total di 24.823 anochi.
Sifranan di yanüari pa sèptèmber 2017
Un impakto direkto di 678 mion florin a keda generá pa nos ekonomia lokal di yanüari pa sèptèmber 2017. Un impakto direkto total di 53.9% a keda generá for di turistanan prosedente di Europa kualnan ta responsabel pa un montante di 366 mion florin. Aña pasá europeonan tabata responsabel pa 353 mion florin pues ta trata aki di un oumento di 4%. For di Nort Amérika un oumento di 4% a keda kalkulá den término di impakto ekonómiko direkto. Turistanan prosedente di Nort Amérika ta responsabel pa 150 mion florin pa loke ta trata e promé 9 lunanan di aña 2017. Aña pasá nan kontribushon tabata 144 mion florin. Turistanan for di Sur Amérika i otro regionnan a generá respektivamente 122 i 41 mion florin e aña aki. Na 2016 e montante generá for di Sur Amérika i otro regionnan tabata 146 i 45 mion florin. E kantidat total ku e turista ta gasta ta keda derivá for di e kantidat di anochi ku e turista a keda riba nos pais. Tantu turistanan prosedente di Europa komo Nort Amérika ta kedando mas largu; esaki ta keda reflehá bèk den nan kontribushon na nos ekonomia lokal.
Un total di 293.159 turista di estadia a keda risibí durante e promé 9 lunanan di 2017. Aña pasá a registrá 333.019 turista di estadia durante e mesun periodo, esaki ta un bahada di 12%. Apesar di e prestashon negativo di dos sifra den sifranan di yegada pa loke ta trata e promé 9 lunanan di aña, ta mira un bahada leve di 2% den e kantidat di anochinan ku e turista a keda riba nos isla. Total turistanan di estadia a keda 2.638.667 anochi na Kòrsou.
63.8% di e kantidat total di anochi pa bishitante ta di turistanan for di Europa, representando 1.683.153 anochi for di e region aki den e periodo di yanüari pa sèptèmber 2017. E kantidat di anochi registrá pa bishitantenan for di Europa ta mustra un kresementu di 4%. For di Nort Amérika, tambe e kantidat di anochi pa bishitante a krese ku 4%. Un total di 402.517 anochi a keda registrá durante e promé 9 lunanan di aña.
