…10 hotèl a partisipá…
WILLEMSTAD- 27 di òktober 2017 – Resientemente CTB den koperashon ku CHATA a ofresé hotèlnan miembro di CHATA e oportunidat úniko di sigui un programa di entrenamentu ku enfoke riba servisio na kliente. E entrenamentu diseñá dor di Teamwork Curaçao spesialmente pa nos merkado, a keda ofresé grátis dor di CTB pa empleadonan ku tin kontakto direkto ku e turista. Un total di 50 persona a terminá e kurso ku éksito. Direktor athunto di CTB, sr. Hugo Clarinda, CEO di CHATA, sr. Miles Mercera i representante di Teamwork Curaçao, sr. Maarten de Jong a felisitá e kursistanan ku e logro importante aki.
E programa a konsistí di e siguiente modulonan: Eksperensia di e Kliente, Komunikashon ku e Kliente, Sorpresá bo Kliente, E Kliente Difísil i finalmente E Kliente Diferente. E programa a keda duná den forma teorétiko i práktiko. E parti práktiko a tuma lugá na e hotèlnan partisipante i a keda hopi bon risibí dor di e partisipantenan i nan manager /supervisor. E partisipantenan a indiká di bai hasi uso sigur di e diferente tepnan balioso ku nan a risibí durante di e kurso. Tambe nan a duna di konosé di ta pará habrí pa un eventual kontinuashon di e kurso. E hotèlnan partisipante tabata: Livingstone Jan Thiel Resort, Rancho El Sobrino, Papagayo Beach Hotel, Lions Dive & Beach Resort, Papagayo Beach Resort, Bon Bini Seaside Resort, Sunscape Curaçao Resort, Spa & Casino, Avila Beach Hotel, Baoase Luxury Resort i Santa Barbara Beach & Golf Resort.
Di parti di CTB ta bai un gradisimentu na tur e hotèlnan ku a brinda nan trahadónan e oportunidat pa partisipá i asina atkerí mas konosementu ku por yuda pa sigui alsa e nivel di servisio di nos sektor turístiko.
