WILLEMSTAD- 8 di febrüari 2018 – Resientemente Ofisina di Turismo di Kòrsou (CTB) huntu ku diferente partner den sektor di turismo a partisipá na e di 49 edishon di ‘International Boat Show Düsseldorf’. E asina yamá ‘Boot Düsseldorf’ a tuma lugá durante dianan 20 pa 28 di yanüari último na Alemania. E feria ta enfoká primordialmente riba turismo di buseo i aktividatnan akuátiko.
E bishitante di ‘Boot 2018’ un bes mas tabatin oportunidat pa tuma informashon na e diferente stèntnan di e destinashonnan partisipante i serka e operadornan di tour. E feria a inkluí un total di 1.923 ekshibidor. E aña aki aproksimadamente 240.000 persona a bishitá e feria for di 68 pais. Tabata un oportunidat perfekto pa ekshibí Kòrsou, komo un hoya den Karibe ku un bida marítimo impreshonante.
Kòrsou a duna tambe diferente presentashon riba e esenario prinsipal di e feria. A ekstendé tambe un invitashon na partnernan importante pa bishitá e stènt di Kòrsou i asina interkambiá ku otro i disfrutá di algu di bebe. Un danki ta bai na e partnernan lokal; Sunreef, Lions Dive and Beach Resort/Ocean Encounters Curaçao, Curaçao Divers, Blue Bay Dive & Coral Divers, All West Apartments & Go West Diving, Rancho el Sobrino/Dive’n Curaçao i Hilton Curaçao ku a kompañá CTB durante di Boot 2018.
