…organisá pa CTB…
WILLEMSTAD – 19 di aprel 2018 – Di 17 pa 19 di aprel último Ofisina di Turismo di Kòrsou (CTB) a kondusí un programa konsistiendo di 2 tayer i un presentashon públiko ku a hiba di título ‘Experiential Travel: Connecting Visitors to the Real Curaçao Experience’. E programa akeda kondusí pa sra. Judy Karwacki ku ta un eksperto internashonal riba tereno di turismo ku mas di 30 aña di eksperensia riba aspektonan relashoná ku biahe, edukashon i maneho.
Na novèmber 2016, sra. Karwacki a bishitá Kòrsou pa promé biaha pa duna konseho na diferente manehadó di atrakshonnan lokal i empresanan turístiko riba kon pa krese nan negoshi dor di elevá eksperensia di e turista. E aña aki, sra. Karwacki lo hasi un evaluashon serka 10 empresa turístiko ku tin e potensial pa por ‘bende’ un eksperensia inolvidabel ku e turista. Riba dianan 17 i 18 di aprel a tuma lugá na Landhuis Bloemhof dos tayer pa e grupo aki ku a konsistí di diferente presentashon i kòmbersashon interaktivo. Tambe e partisipantenan a siña kon pa traha un iterinario kompletamente dirigí riba kon laga e turista eksperensiá e produkto ku ta keda ofresé na dje ku e meta pa krea un eksperensia memorabel.
Riba dia 19 di aprel último a tuma lugá na Hilton Curaçao e presentashon públiko. Meta prinsipal di e presentashon tabata pa hasi e públiko, kual a konsistí di partnernan den sektor públiko i privá i proveedónan di servisio na turista,konsiente di e trènt ‘Experiential Travel’ i e benefisionan ku esaki ta trese kuné. Konsiderando ku Kòrsou tin hopi di ofresé na e turista, ta imperativo pa hasi uso di e instrumento aki pa sigui promové nos destinashon. Sra. Karwacki a elaborá riba diferente tópiko manera desaroyonan nobo riba tereno di aktividatnan turístiko, e tipo di tour ku ta keda ofresé na e turista, ‘sharing economy’ entre otro Airbnb, e konsepto di‘Transformational Travel’ i muchu mas.
CTB ta mira bèk riba 3 dia sumamente edukativo kaminda tur ku a partisipá na e tayernan i e presentashon públiko a risibí hèrmèntnan nobo pa huntu nos sigui desaroyá nos produkto turístiko.
