WILLEMSTAD – 21 di mei 2018 – Resientemente Chef Broertje Marshall a organisá un almuerso pa asina yama danki na Ofisina di Turismo di Kòrsou (CTB) pa e sosten risibí durante su trayektoria kompitiendo komo kokí profeshonal. Chef Charlwin Marshall mihó konosí komo Chef Charlie òf Chef Broertje Marshall tin un trayektoria largu i eksitoso pa loke ta trata e mundu kulinario. CTB semper a asistí Chef Broertje Marshall ku material di promoshon durante kompetensia internashonal i na algun okashon a bai ku Chef Broertje komo parti di e tim di Kòrsou durante eksibishonnan internashonal manera por ehèmpel Sabor Barranquilla na Colombia. Na 2016 CTB a organisá tambe un agasaho pa Chef Broertje Marshall komo muestra di apresio pa su presentashonnan den eksterior.
Resientemente Chef Broertje Marshall a pasa e batuta over pa loke ta trata su partisipashon na kompetensianan internashonal motibu pa kual e la organisá un ‘Thank You Lunch’ pa e tim di CTB ku asistensia di Chef Kenrick Amalia i Chef Fercho Perez. Chef Fercho Perez a bini spesialmente for di Ecuador pa kompartí ku Chef Broertje Marshall i Chef Kenrick Amalia.
E tim di CTB a keda enkantá ku e delisioso almuerso. Ademas di e tim di CTB, Minister di Enseñansa, Siensia, Kultura i Deporte, sra. Alcalá-Wallé tambe tabata presente na e okashon spesial aki. CTB a otorgá tur tres Chef un rekuerdo komo muestra di apresio. CTB ta deseá tur tres Chef tur klase di éksito den futuro.
