…10% mas turista di estadia na yüni 2018…
WILLEMSTAD – 20 di yüli 2018 – Ofisina di Turismo di Kòrsou (CTB) ta raportá un kresementu total di 10% mas turista na yüni 2018. Den sifranan apsoluto ta trata aki di 2.862 turista mas na yüni 2018 hibando e total na 30.820 turista di estadia kompará ku 27.958 e mesun luna aña pasá. Tur merkado di enfoke a presta bon durante luna di yüni. Hulanda, Estádos Unídos, Canada, Brazil, Colombia i Aruba tur a presta bon na yüni 2018.
Europa, e region for di kual nos ta risibí mas tantu turista a krese ku 14% na luna di yüni. Un total di 14.725 turista di estadia a bishitá nos pais for di Europa kompará ku 12.953 na aña pasá. Kòrsou a risibí 12.062 turista for di Hulanda. Hulanda e merkado for di kual nos ta risibí mas tantu turista, a klousura yüni ku un kresementu di dòbel sifra di 18%. Ta promé biaha den historia ku nos a surpasá 12 mil turista di estadia na luna di yüni. Hulanda ta kontinuá komo e merkado prinsipal; 39% di e total di turista risibí ta prosedente for di e pais aki. E kresementu aki ta komo resultado di e dos buelonan adishonal for di Amsterdam e temporada di zomer aki. E buelonan ku a inisiá 18 di yüni último entre Bruselas i Kòrsou a resultá den 40% mas turista for di Bèlgika. Un total di 467 bishitante prosedente di Bèlgika a bishita Kòrsou na yüni 2018.
CTB a registrá un total di 7.523 turista di estadia for di Nort Amérika na yüni 2018. Ku e resultado aki Nort Amérika ta e di dos kontribuidó den kantidat di turista di estadia. For di Canada un total di 680 turista di estadia a keda registrá kual ta un oumento di 3% pa e temporada abou di turismo. For di Estádos Unídos un kresementu di 28% a keda registrá na yüni 2018. Estádos Unídos a konta ku muchu mas stul adishonal e zomer aki kual no tabata e kaso aña pasá. For di Charlotte tin e introdukshon di e di dos buelo semanal i for di Miami e kambio di avion pa unu mas grandi di American Airlines. Ademas, JetBlue a start ku un di 4 buelo semanal for di New York (JKF) dia 19 di yüni último. Tur e buelonan adishonal aki kombiná ku e esfuersonan di merkadeo di Kòrsou dor di CTB i su partnernan a sòru pa Estádos Unídos registrá un total di 6.843 turista na yüni. Aña pasá e kantidat di turista di estadia ku a keda registrá tabata 5.348.
Tur dos merkado di enfoke den Sur Amérika a presta bon na luna di yüni registrando sifranan dòbel di kresementu. For di Colombia un oumento di 14% a keda registrá pa un total di 2.250 turista di estadia. E kresementu den turista di estadia ta komo resultado di e akshonnan di merkadeo. Tráfiko for di Brazil a registrá kresementu di 15% na yüni 2018. Total nos a risibí 819 brasilero. Un total di 1.986 turista a keda risibí for di Karibe na yüni 2018. For di pais bisiña Aruba, un kresementu di 27% a keda registrá. Un total di 1.115 arubiano a biaha pa Kòrsou na yüni.
Turismo di estadia yanüari te ku yüni 2018
Total Kòrsou a risibí 204.804 turista di estadia durante e promé mitar di aña. Esaki ta un kresementu di 2% kompará ku aña pasá. Si kita afó e kantidat di turista risibí for di Venezuela lo por papia di un kresementu di 8%. Durante e promé 6 lunanan di aña 2018 un total di 86.435 turista hulandes a keda risibí kual ta un oumento di 11%. Aña pasá e mesun periodo un total di 77.744 turista hulandes a bishitá nos pais. For di Estádos Unídos un kresementu di 14% a keda registrá pa un total di 36.094 turista di estadia di yanüari pa yüni 2018. Na 2017, un total di 31.743 turista di estadia a keda risibí for di Estádos Unídos. Canada a krese ku 6% pa un total di 13.517 turista di estadia durante e promé mitar di aña.
Turismo a produsí un impakto direkto di 560 mion florin pa nos ekonomia lokal durante e promé mitar di aña 2018. 46% di e impakto direkto total a keda generá for di turistanan prosedente di Europa kualnan ta responsabel pa 260 mion florin. E impakto direkto for di demas regionnan ta di e siguiente manera: Nort Amérika ku 147 mion, Sur Amérika ku 82 mion i Karibe i otro regionnan 71 mion florin.
