…19% mas turista di estadia na yüli 2018…
WILLEMSTAD – 24 di ougùstùs 2018 – Ofisina di Turismo di Kòrsou (CTB) ta raportá 19% mas den kantidat di turista di estadia na yüli 2018. Den sifranan apsoluto ta trata aki di 5.633 turista mas na yüli 2018 hibando e total na 35.408 turista di estadia kompará ku 29.775 e mesun luna aña pasá. Yüli ta konosí komo un di e lunanan den kua hopi turista ta skohe pa bishitá Kòrsou.
Kòrsou a risibí 15.895 turista di estadia for di Hulanda. Hulanda e merkado for di kual nos ta risibí mas tantu turista, a klousura yüli ku un kresementu di dòbel sifra di 20%. Hulanda ta kontinuá komo e merkado prinsipal; 45% di e total di turista risibí ta prosedente for di e pais aki. E kresementu aki ta komo resultado di e dos buelonan adishonal for di Amsterdam e temporada di zomer aki. E buelonan ku a inisiá 18 di yüni último entre Bruselas i Kòrsou a resultá den 40% mas turista for di Bèlgika. Un total di 907 bishitante prosedente di Bèlgika a bishitá Kòrsou na yüli 2018.
For di Estádos Unídos un kresementu di 32% a keda registrá na yüli 2018. Estádos Unídos a konta ku muchu mas stul adishonal e zomer aki kual a resultá den un prestashon ekselente na yüli 2018. Pa rekapitulá; for di Charlotte tin e di dos buelo semanal i for di Miami e kambio di avion di American Airlines pa unu mas grandi. JetBlue a start ku e di kuater buelo semanal for di New York (JFK) riba 19 di yüni. Tur e buelonan adishonal kombiná ku e esfuersonan di merkadeo di Kòrsou dor di CTB i su partnernan a sòru pa Estádos Unídos registrá un total di 6.111 turista di estadia na yüli. Aña pasá e kantidat di turista di estadia prosedente di Estádos Unídos tabata 4.622. For di Canada un total di 629 turista di estadia a keda registrá kual ta un oumento di 6% pa e temporada abou di turismo.
Tur dos merkado di enfoke den Sur Amérika a presta bon na luna di yüli registrando sifranan dòbel di kresementu. For di Colombia un oumento di 19% a keda registrá pa un total di 1.810 turista di estadia. E kresementu den turista di estadia ta komo resultado di e akshonnan di merkadeo den kombinashon ku buelonan charter. Tráfiko for di Brazil a registrá kresementu di 78% na yüli 2018. Total nos a risibí 1.463 brasilero. E kresementu eksepshonal for di Brazil ta komo resultado di e kantidat di stul adishonal ku Copa Airlines for di Panama. Total region di Sur Amérika a krese ku 2%. Ta e promé biaha for di aprel 2016 ku e region a klousura ku un prestashon positivo. E pèrdida di turista di estadia for di Venezuela (-52%) no a afektá e prestashon total di region di Sur Amérika. For di pais bisiña Aruba, un kresementu di 11% a keda registrá. Un total di 1.168 arubiano a biaha pa Kòrsou na yüli. Trinidad & Tobago tambe ta mustra kresementu den kantidat di turista di estadia, ku 29% mas turista.
Turismo di estadia yanüari te ku yüli 2018
Total Kòrsou a risibí 240.214 turista di estadia durante e promé 7 lunanan di 2018. Esaki ta un kresementu di 4% kompará ku aña pasá. Durante e promé 7 lunanan di aña 2018 un total di 102.331 turista hulandes a keda risibí. Aña pasá e mesun periodo un total di 90.950 turista hulandes a bishitá nos pais, un kresementu di 13%. For di Estádos Unídos un kresementu di 16% a keda registrá pa un total di 42.205 turista di estadia di yanüari pa yüli 2018. Na 2017, un total di 36.365 turista di estadia a keda risibí for di Estádos Unídos. Canada a krese ku 6% mas turista pa un total di 14.146 turista di estadia durante e promé 7 lunanan di 2018.
Turismo a produsí un impakto direkto di 664 mion florin pa nos ekonomia lokal durante e promé 7 lunanan di aña 2018. 47% di e impakto direkto total a keda generá for di turistanan prosedente di Europa kualnan ta responsabel pa 313 mion florin. E impakto direkto for di demas regionnan ta di e siguiente manera: Nort Amérika ku 166 mion, Sur Amérika ku 99 mion i Karibe i otro regionnan 86 mion florin.
