WILLEMSTAD – 28 di ougùstùs 2018 – Resientemente Ofisina di Turismo di Kòrsou (CTB) i su partnernan a tene diferente seshon edukashonal pa agentenan di biahe na Medellín i Bogotá, Colombia. Un gran porsentahe di bishitantenan for di Colombia ta bini di e dos siudatnan aki. Aktualmente, mas di 48% ta bini for di Bogotá i 22% for di Medellín.
CTB su ophetivo ta pa sigui ku su esfuersonan di merkadeo den e dos siudatnan aki pa asina atraé mas turista for di Colombia pa bishitá Kòrsou. Den estrecho kolaborashon ku sektor privá, CTB ta ehekutando diferente akshon promoshonal na Medellín i Bogotá via e medionan di publisidat manera entre otro; korant, billboard, televishon, radio, teater di sine, online, medio sosial i mas. Huntu ku esei, ta importante pa stimulá i eduká nos partnernan di negoshi esta, agente di biahe, tour operator i aerolínea, pa tene Kòrsou presente serka nan.
CTB su Roadshow promoshonal (Caravana Promocional) di mas resien a inkluí un evento pa 85 agente di biahe i 35 mayorista na Hotel Viaggio na Medellín. Tambe e miembronan di e delegashon, konsistiendo di CTB i partnernan di sektor privá, a ofresé un seshon di training di benta na e sentro di reservashon prinsipal di Avianca. E seshon aki a dura mitar dia. Despues e delegashon a biaha pa Bogotá pa tene un seshon interaktivo di desayuno ku 24 miembro di prensa siguí pa seshonnan di negosiashon ku mas di 60 mayorista na Bioxury Hotel. E seshonnan a tuma lugá durante un almuerso kolorido di kual e tema tabata Kòrsou. E evento akí, a resultá den publisidat amplio riba e plan- i metanan ambisioso ku Kòrsou tin.
Tabatin dos evento mas pa agentenan di biahe na Bogotá, na e popular establesimentunan El Céntrico i Club Colombia. Esakinan tabata hopi bon bishitá, ku na tur mas di 350 agente di biahe riba e anochi dediká na Kòrsou. Na e eventonan akí, kada mesa di agentenan di biahe a haña 15 minüt pa presentá un di Kòrsou su puntonan di benta úniko. E agentenan di biahe a duna un tremendo presentashon usando kreatividat, músika, aktuashon, disfras i koló pa por gana e premio pa bishitá Kòrsou.
CTB ta satisfecho ku resultado di e roadshow na Medellín i Bogotá, i ta gradisí tur partner enbolbí, esta: Acoya Curaçao Resort Villas & Spa, Avila Beach Hotel, Hilton Curaçao, Kura Hulanda Village & Lodge, Lions Dive and Beach Resort, Livingstone Jan Thiel Resort, Papagayo Beach Resort, Renaissance Curaçao Resort & Casino, Santa Barbara Beach & Golf Resort, Sunscape Curaçao Resort Spa & Casino. Huntu ku e hotèlnan, Fiesta Tours, Avianca, Copa Airlines i Flying Dutch Festival tambe a partisipá den e eventonan organisá pa promoshon di Kòrsou.
