…Nan a drenta funshon mesora!…
WILLEMSTAD- 25 di sèptèmber 2018 – Resientemente 13 hóben a gradua komo guia turístiko despues di a sigui un kurso intensivo di ‘Tourist Guide & Hospitality’. E kurso a keda inisiá aña pasá sèptèmber dor di Ofisina di Turismo di Kòrsou (CTB) den estrecho koperashon ku Reda Sosial, SOAW i One Curaçao e organisashon sertifiká di ‘Tourist Guide & Hospitality Training’ kual tabata enkargá ku e kurso. E programa di sertifikashon pa hóbennan entre 18 i 33 aña a pèrkurá pa e partisipantenan risibí un kurso intensivo di Guia Turístiko i Hospitalidat. Durante un seremonia spesial e 13 graduadonan a risibí nan diploma for di man di Promé Minister sr. Eugene Rhuggenaath, Minister di Desaroyo Ekonómiko Dr. Steven Martina i Minister di Desaroyo Sosial, Labor i Bienestar sr. Hensley Koeiman.
E hóbennan a risibí un diploma kual ta rekonosé pa World Federation of Tourist Guide Associations. Ademas di esaki, nan lo ta e promé ku lo haña un “Blue Badge” aprobá i rekonosé dor di CTB. Mayoria di e graduadonan a drenta sektor turístiko kaba i ta laborando komo guia turístiko. CTB di su banda tambe ta dunando nan e oportunidat pa traha komo guia turístiko pa gruponan ku ta bin for di eksterior.
CTB, Reda Sosial, SOAW i One Curaçaota felisitá, Damaris Sambo kual a resultá di ta e mihó graduado, Anaïs Godfried Arundel, Berliza Jansen, Christy Mendes Brazao, Dewi Pomario, Ian de Windt, Jonathan Estanista, Quincy Carolus, Ray de Keyzer, Riangelo Jones, Ryan Quinland, Tyrone Brunken i Amaries-Anne Koeiman ku e logro importante aki. CTB i su partnernan ta deseá kada graduado hopi éksito den nan karera komo guia turístiko i ta konta ku nan lo sa di bende Kòrsou di un manera ku ta inolvidabel pa nos bishitantenan. Masha Pabien!
