WILLEMSTAD- 5 di òktober 2018 – Resientemente Ofisina di Turismo di Kòrsou (CTB) ku ta enkargá ku kordinashon di e aria di rekreo na Marie Pampoen a organisá un enkuentro pa asina ofisialisá komienso di e trabounan na e kompleho deportivo eksistente na Marie Pampoen. Komo parti di e trabounan ku ta tumando lugá na e aria di Marie Pampoen, e kompleho deportivo lo bai keda rekonstruí den un fasilidat nobo. E proyekto desaroyo aria di rekreashon Marie Pampoen ta un inisiativa di Ministerio di Desaroyo Ekonómiko huntu ku Ministerio di Tráfiko, Transporte i Planifikashon Urbáno i Ministerio di Salubridat Públiko, Medio Ambiente i Naturalesa. Na e enkuentro a hiba palabra Minister Steven Martina, Minister Zita Jesus Leito i Minister Suzy Camelia Römer. Tur a ekspresá nan satisfakshon ku e anunsio ofisial di e trabounan ku lo bai start pa asina konstruí un kompleho deportivo nobo. Tambe e atardi a konta ku diskurso di sr. Edfrim Reina di Fundashon Desaroyo Marie Pampoen i Bisendario i tambe sr. Andy Janga di Fundashon pa Progreso Marie Pampoen.
E kompleho deportivo nobo lo enserá un edifisio inkluyendo espasio pa un ofisina, snèk, terasa, kleedkamer i tualèt. Tambe lo bini un vèlt multi funshonal pa basketbòl i vòlibòl, dos vèlt pa bolas krioyas i un vèlt pa futbòl ku yerba artifisial. Na aña 2015 a enkargá CTB ku desaroyo di e aria di rekreashon Marie Pampoen. Despues di risibí tur e pèrmitnan nesesario konstrukshon di e aria parti Wèst a kuminsá na aña 2016. Na aña 2017 e fase aki a keda konkluí. Awor ta sigui ku e kompleho deportivo nobo.
CTB i demas partnernan den e proyekto ta gradisí tur usuario i spesialmente habitantenan di Marie Pampoen pa e komprenshon i pasenshi pa kualke molèster ku e trabounan por kousa i ta kòrda tur usuario ku ta únikamente huntu nos por pèrkurá pa e aria aki keda mantené komo un lugá agradabel pa nos hendenan i turistanan por rekreá.
